Aragoi, Galizia, Asturias, Gaztela-Mantxa eta Euskal Herriko folk musika eskainiko du Urdufolk jaialdiak Urduñako Foru Plazan ostiral eta larunbatean 21:30etik aurrera. Ekitaldi biak musu-truk eskainiko dituzte hiriko Koroatze jai programa barruan. Joseba Urruela, antolatzaileetako baten esanetan “oso aukera ona izango da bai ostiralean zein larunbatean estatuaren esparruan garrantzitsuak diren taldeak ikusteko”.
Ekimenaren estreinako kantaldian, ostiralean, Asturiaseko Tejedor eta Galiziako Faltriqueira taldeak arituko dira.
Asturiar musika tradizionalean errotutako konposizio propioak eskaintzen dituzte Avileseko Jose Manuel eta Javier Tejedor anaiek. Lau disko argitaratu ditu taldeak 1995az geroztik, azkenengoan, “Positivu” izenburukoan izan zuten musikari gonbidatu zerrenda luzean, Iñaki Plaza eta Ion Garmendia aritu ziren txalaparta eta Indiako taulekin.
Faltriqueira osatzen duten lau emakumeek bestalde, polifonia, perkusioa eta instrumentu akustikoen arteko fusioa eskaintzen dute. Taldearen lehen jarduna Galiziako musika tradizionaletik abiatu bazen ere, beste hainbat herrialdetako eta musika estiloetako ekarpenak bildu dituzte.
Folk lehiaketa
Larunbatean berriz lehiaketa ebatziko da 3 finalisten artean: Euskal Herriko Kherau, Aragoiko Maut eta Gaztela-Mantxako The fatty farmers. 1.000 euroko diru-poltsa eta kontzertua Radio Euskadiko La Jungla Sonora saioan igortzea izango da lehiaketaren lehen saria. 600 eta 300 euroko sariak eskuratuko dituzte bigarren eta hirugarren sailkatuek.
Kherau boskote bizkaitarrak folk akustiko euskalduna eskaintzen du. Euskal tradiziozko kantutegian oinarritutako kantak eta beraiek sortutakoak uztartzen dituen errepertorioa dute, besteak beste, aurtengo Ibilaldiko kantaren egileak dira.
Maut taldearen eskaintza berriz, Aragoiko musika tradizionaletik abiatzen da. Neofolk deitzen duten estiloa garatuz, musika elektronikoarekin fusionatu dituzte Aragoiko doinuak beraien lanean.
The fatty farmers taldea azkenik musika zeltikotik abiatzen da, dantzarako punk-rock-folk proposamena osatuz.
Giro herrikoia
Joseba Urruela Iñaki Plazarekin batera Urduñako jai batzordearekin elkarlanean ekimena abian jartzeko apustua gauzatzeaz arduratu da. Baikor azaldu da ekimenaren bezperan: "Oso aukera ona izango da bai ostiralean zein larunbatean estatuaren esparruan garrantzitsuak diren taldeak ikusteko. Maila handiko taldeak dira eta ez da ohikoa horrelako taldeek Euskal Herrian jotzea. Giro herrikoia espero dugu jaialdian eta doakoa izango da. Lehen urtea izateko eta krisialdia aintzat hartuta, ekonomikoki nahiko mugatua egon da proiektua baina hala ere hor dago apustua”.
Urdufolk ekimenaren informazio guztia http://urdufolk.com/ webgunean bildu dute, Foru Plazan izango diren bost taldeen kantuak myspace bidez ezagutzeko loturak barne.