Ekitaldi sorta etengabea ari da eskaintzen Aresketa Ikastola Arabako Ikastolen jaia Amurrion ospatzen ari den honetan. Eguraldi bikainak lagunduta milaka euskaltzale bildu da zirkuitoan barrena antolatutako jai egitarauak lotutako proposamen anitzetan parte hartzeko gogoz.
10:00etan abiatu dira bisitari goiztiarrenentzako ekitaldiak Parkea eta Plaza bateratzen dituen gunean eta El Reforreko haurren gunean. Ordurako aurtengoan laguntzaile ari diren 500etik gorako euskaltzaleak, iratzargailuak aspaldi astinduta, lanean ari ziren bisitariek dena prest aurkitu zezaten.
Omenaldia
Haur eta gazteen guneak El Refor inguru paregabean kokatu dituzte antolatzaileek. Berton izan da 11:30ean Erramun Martikorenari eta Karlos Larrinaga zenari eskainitako omenaldia.
Trafiko arazoak direla medio euskal bardoak ez du omenaldira garaiz heltzea lortu. Amaia Larrinaga, omendutako Karlos Larrinagaren alaba gazteenak zuzendu du omanaldian aritu den abesbatza eta Andere Larrinagak hitz batzuk eskaini ditu oroigarria familiaren izenean eskuratzean. Aresketa Ikastolaren hastapenetan bertoko ikasleei kitarrarekin lagunduta irakatsitako kantak izan ditu gogoan ikasle ohi batek baino gehiagok une horietan.
2014ko hitzordua Errioxan
2014ko Araba Euskaraz Assa ikastolaren esku izango dela iragarri dute ekitaldian. Xabier Arrietak, Arabako Ikastoletako lehendakariak, lekukoa eman die Lapueblatik hurbildutako Idurre Arrietari eta Adela Txabarriri.
Eguerdi partean zirkuitoak Parkean zein El Refor gunean eskaintzen dituen itzalen bila ari dira euskaltzale gehienak bazkalostean jaiak oraindik eskaintzeko dituen ekitaldiekin gozatzeko.
Aiaraldea.com lanaz lepo
Jarraipen berezia ari da eskaintzen aiaraldea.com eskura dituen baliabide guztiak erabilita. Jaiaren berri izan dezakezu une oro argazki galeriatan, zirkuito osoan entzungai dagoen airaladea fm emisioaren bidez zein sare sozialen bidez.