Arabako herri eta koadrilatako euskara elkarteetako eta Euskaltzaleen Topaguneko ordezkariek Hizkuntza Politikaren aldaketa eskatu zuten maiatzaren 24an Batzar Nagusietako Euskara, Kultura eta Kirola batzordearen aurrean egindako agerraldian.
Arabako Euskaltzaleen Topagunea, Aiarako Hogeitalau elkartea, Gasteizeko Geu elkartea, Laudioko Basalarrina, Baranbioko Belaiki, Aramaioko Txirritola, Zuiako Bidabarri, Arabar Errioxako Ttiki Ttaka eta Airaldea Komunikazio Elkartea biltzen dira ekimenean.
Herri eta koadrilatako euskara elkarteek garatzen duten lanaren berri eman ondoren, Arabako Batzar Nagusiek eta Aldundiak garatzen duten Hizkuntza Politikaren gaineko kezka eta iritziak eskaini zituzten, bai eta zenbait eskari zehatz ere luzatu.
Alarma
Herri mugimenduak bultzatutako egitasmoetarako diru-laguntzek Aldundiko aurrekontuetan izan duten atzerakadak eta 2012 urtearen amaieran koadrilatako euskara teknikarien sarearen finantzazioa kolokan jartzen zuten egitasmoek alarma piztu dute Arabako euskaltzaleen artean.
Horren aurrean, eragile sozialek elkarlanerako jarrera agertu zuten eta Hizkuntza Politika ausart eta koherentea eskatu zieten Batzar Nagusietako ordezkariei.
Honez gain, Euskaltzaleen elkarteen funtzioaren aitortza eta babesa bideratze aldera hitzarmenen bidezko harremana sustatzea proposatu zuten, orain arteko egitasmo zehatzak soilik diruz laguntzeko dinamikatik aldenduz.
Egoera zehatzak aztertzean, euskaltzaleek Aldundiak 2013rako hainbat diru-laguntza deialdi oraindik bideratu gabe izateak eragiten duen ezinegona helarazi zuten. Honen harira, administrazio publikoak bultzatutako finantzazioak beharrezko dituen kontrol neurriak aitortuta, egungo diru-laguntza prozedurek sortzen duten gehiegizko burokrazia arintzeko eskaera luzatu zuten.
Azkenik, Euskararen Aholku Batzordea biziberritzeko beharra plazaratu zuten.