Otsaila hasierako egunetako ohitura ezberdinek koplaz girotuko dituzte Aiaraldeko herri eta auzoak. Abiapuntua Aiara Udalerriko Zuhatza eta Lanteno herrietan jarriko dute otsailaren 2an, kandelaria egunean.
Lantenon dute 12:00etan lehen hitzordua. Eskoletan bilduko dira eta entsegua egin ondoren etxez-etxe kantatzera abiatuko dira. Erreta Lantenoko eta Opellarako gazteak ere hurbilduko dira bertora eta ibilbideak herri biak izango ditu kontutan. Egun osoko ekimena izango da, bazkaltzeko tartea utzita. Amaierako ekitaldia 20:30ak aldera Satia txokoan iragarrita dute. Bertan txerri-hanken zozketa egin ondoren, herriko apaiza, alkatea eta aurten “montanero” gisa aritu diren auzokide biek afaria izango dute.
Zuhatzan ere ospatzen dute Kandelaria. 13:00etan meza eta poteoa iragarri dituzte eta 21:00etatik aurrera txerri-hanka eta belarrien zozketa, Dominic magoaren agerraldia, Malsonado kantautorea eta “Txarripatas punK-rock agropunk” taldearen emanaldiak izango dituzte.
Agate deuna bezpera
Agate deuna bezpera eskola eguna izanda, eskualdeko ikastetxe guztietako ikasleek herri eta auzoetako kaleak girotzeko aukera izango dute egunean zehar. Arratsalde parterako hitzorduak nonahi izango dira.
Amurrion 1995ko kintoak izango dira Agate Deuna bezperako koplen protagonistak. Ondorengo kintoen jaia inauterien osteko ostiralera, otsailaren 15era, pasa dute aurten.
Orozkoko hitzordua 15:00etan jarri dute Zubiaurreko plazan eta Aiaraldeko berbalagunek hitzorduak jarri dituzte Urduñan eta Laudion.
Laudion bestetik ohiko taldeak aterako dira ere kantuan, Arloteak, Andere abesbatza, Ikastola, eta abar.
Okondon azkenik San Blas egunerako iragarrita dago kantatzera ateratzeko hitzordua 17:30ean.