EAEko gainerako ikastetxeetan bezala, 2 urtetik 16 bitarteko ikasleen aurrematrikula zabalik izango da urtarrilaren 28tik otsailaren 8ra Aiaraldeko ikastetxeetan.
Eskualdeko ikastetxe guztiek, Hezkuntza Administrazioak eta udal zerbitzuek aurrematrikula garaiari begirako ekimen ezberdinak abiatu dituzte, publizitate kanpainak edo ate irekien jardunaldiak kasu, gurasoek seme-alaben etorkizun akademikoa aztertzeko momentuan informazio guztia eskura dezaten.
3 ikastetxe aukeratu ahal izango dituzte familiek, lehentasunaren hurrenkeran, aurrematrikulan eta Hezkuntza Administrazioak araututako baremoak ebatziko du, eskainitako plaza kopurua gainditzen dituzten ikastetxeetan, plaza esleipena. Aurrematrikula internet bidez bidera badaiteke ere, beharrezko dokumentazioa aukeratutako lehen ikastetxera eraman beharko dute familiek, besteak beste, familia liburua, ENA edo errolda agiria. Ikastetxearekiko gertutasuna izango da baremazioetan pisu gehien izango duen faktorea. Errenta baxuenek, lanpostua ikastetxetik gertu dituztenek, familia ugariek eta kide elbarririk duten familiek egoera horien frogagiriak ere aurkeztu ahal izango dituzte.
Ez da berrikuntza nabarmenik sumatu aurrematrikulan titulartasun publikoko zein ekimen sozialeko ikastetxeen jardunean. Hezkuntza sektoreak egun bizi duen murrizketa politika areagotzeko mehatxu etengabeak edo espainiar Hezkuntza ministroak abiatutako LOMCE legeak ez dute islarik izan hezkuntza komunitateak gizarteratzen duen ekimen nagusian.
D bitamina
Laudioko udalak D ereduaren aldeko gomendioa berretsi du “D bitamina. Aberastu bere heziketa” kanpaina beraien seme-alaba lehen biziko aldiz matrikulatzera doazen familiei zuzenduz.
Gaztelaniazko heziketa elebakarrarekin alderatuta eredu euskaldunak eskaintzen dituen eskola errendimendua indartzeko, aberasteko eta hobetzeko onurak eta hiztun eleanitzek, euskara zein gaztelania ederki menperatuta hirugarren hizkuntza batean aritzeko gaitasuna ere duten ikasleek, etorkizunari begira duten abantaila azpimarratzen ditu kanpainak.
Laudioko udal euskara arloak emandako datuen arabera 2012/13 ikasturterako 2 urteko haurren aurrematrikulan 10etik 7k aukeratu zuten D eredua Laudion, EAEko %70eko batesbesteko berdina.