Euskal Herriko haur eta neska-mutilak gabon-gauaren protagonista bihurtzen dituzten Olentzero eta Mari Domingi pertsonaia euskaldunek ongi etorri beroa izango dute Aiaraldeko auzo eta herri guztietan.
Bezperako egunetan, hainbat ikazkin lagun, han-hemenka jaso dituzte eskualdeko neska-mutil guztien eskaerak eta, abenduaren 24ko gauean, magia ariketa aparta eskainita, etxe guztietara hurbilduko dira opariak banatzera.
Orozkon jarri dute lehen hitzordua 16:30ean Zubiaur plazan eta 17:30ean museoan herriko neska-mutilak agurtuko dituzte.
Arrankudiagako Elexalde plazan 17:00etan izango dira. Arratsaldeko programa pilota partidekin, 18:30ean frontoian, eta Hator, Hator etxera! Kontzentrazioarekin, 19:00etan, osatu dute. Gizarte etxean gaztaina erreak eta txokolate jana eskainiko dute.
Luiaondoko kalejira 17:00etan abiatuko da zubibarritik, eta amaierako harrera 19:00etarako iragarri dute pilotalekuan.
Urduñako kalejira 17:00etan abiatuko da kultur etxetik.
Okondoko kalejira Okondogoienatik abiatuko da, Bentila ingurutik,17:30ean. Opari banaketarako geldiune bi iragarri dituzte supermerkatu inguruan eta plazan. 18:00etan dantza taldea abiatuko da kalejiran eta 19:00ak inguru postal lehiaketaren sari banaketa iragarri dute.
Artziniegako hitzordua 18:00etan jarri dute futbol zelaian. Amaierako ekitaldia Goiko Plazan egingo dute eta gaztaina erreak eta ardo gozoa eskainiko dute bertan.
Laudioko kalejira 18:00etan abiatuko da. Aurtengoan kultur etxea, udaltzainen lehengo egoitza, izango da abiapuntua, bertora helduko dira Olentzero eta Mari Domingi. Kalejirak ibilbide berria izango du; Lamuza plazatik, Zumalakarregi etorbidetik eta Alberto Acero plazatik egingo du ibilbidea Herriko Plazara heltzeko.