Laudioko Bilduren Gobernu Taldeak gogorki salatu du PSEk gobernu erantzukizuna uzteko bezperako egunetan Laudio barne hartzen duen Araba eta Bizkaiko 50.000 hektareatako SAIA baimena SHESA enpresari aitortu izana.
Baimen honek funtsean fracking teknika zonalde horretan garatzeko ikerketak sei urtez ahalbidetuko ditu. Erabaki hau bertan behera uztea exijituko duen mozioa aurkeztu du Bilduk hurrengo Udalbatzak aztergai izan dezan.
Honez gain, Laudio “frackingetik aske dagoen udalerri”gisa izendatzea proposatuko du Bilduren mozioak.
Ez da Laudioko Udalbatzak fracking teknikaren inguruan aztergai izango duen lehen mozioa. Ekainaren 26an Udala fracking teknikaren aurka azaltzea eta aritzea proposatzen zuen mozioa aurkeztu zuen Fracking ez Araba plataformak Omnia eta Bilduren bitartez. EAJk aurkeztutako mozio alternatiboa atera zen orduan aurrera PSEren botoei esker. Jeltzaleen proposamenak bide irekia utzi nahi zion apurketa hidraulikoa erabiltzen duen teknika honi, baldin eta etorkizunean hain urratzailea ez bada.
BILDUk jarrera argia eta arduratsua eskatuko die gainerako taldeei fracking teknika bideratzeko ikerketak Laudion sei urtez ahalbidetuko duen baimenaren aurrean.
Legebiltzarraren aurrean protesta
Fracking ez Araba plataformak kontzentrazioa burutu zuen atzo arratsaldean Gasteizko Legebiltzarraren aurrean Jaurlaritzak bideratutako lehen SAIA baimena salatzeko. Laudio, Basauri, Galdakao, Arrigorriaga, Arratiako bailara, Ugao eta Bilboko auzo batzuk (Bolueta, Etxebarri, Larraskitu) barne hartuko ditu SHESAk garatuko duen ikerketak.
Arratia eskualdean, “Arratien Fracking Bako Udalerrien” ekimena garatzen ari da egunotan udaletan mozioak aurkeztuz eta hainbat ekitaldi, dokumental proiekzioak kasu, deituz.
Hitzaldia Orozkon
Aiaraldean ere ekimen ugari bideratzen ari dira herritar ekimenetik fracking teknikaren arriskuak ezagutarazteko. Orozkon, ostiralean, abenduak 14an, hitzaldia eskainiko dute Kultur Etxean bertoko Gazte Asanbladaren eskutik 18:30ean.