Berria egunkariaren aldeko bertso-afaria deitu dute azaroaren 30erako, ostiralerako, gaueko 21:00etan, Basalarrina elkarteak eta Laudioko udalak. “Zure ziztada behar dugu” lemapean, euskarazko hedabidearen aldeko bazkidetzak lortzeko Euskal Herri osoan garatzen ari den kanpaina sustatzeko ekitaldia izango da.
Anjel Mari Peñagarikano (Albiztur, 1957) eta Xabier Silveira (Lesaka, 1976) izango dira bertso gauaz arduratuko direnak. Afaria Basalarrina elkartearen egoitzan ospatuko da eta txartelak 20 eurotan izango dira salgai azaroaren 27a bitartean Ilargi tabernan eta AEK eta Udal euskaltegietan.
Bertso-saioak ostegun eta ostiralean
Bertsolaritza inguruko ekimenak izango dira ere aste honetan zehar. Ostegunean, hilak 22an, bertso-saio didaktikoak programtu dituzte Laudioko euskaltegietan Arabako Bertsozale Elkarteak eratutako Bertsozaletu egitasmoaren eskutik.
Ostiralean azkenik, Bertxoko sariketaren azken kanporaketa burutuko dute Laudioko gaztetxean 19:30etik aurrera. Izar Mendiguren, Iker Agirre, Josu Kanpo, Peio Ormazabal, Uxue Ruiz de Arkaute eta Patxi Iriart arituko dira Arabako Bertsozale Elkartearen eta Hala Bedi Irratiaren artean antolatzen duten bertsolari gazteen arteko sariketan.