Laudioko Andaluzia eta Extremadura etxeek antolatutako flamenko jaialdiaren seigarren edizioa ospatuko da azaroaren 10ean. Hitzordua 20:00etan Lanbide Heziketa Eskolako aretoan izango da. Celia Romero, Manuel Cuevas eta Algarabia taldea izango dira jaialdiaren programan. Sarrerak ekitaldiaren atean bertan eskuratu ahal izango dira 10 euroren truke edota, aurretik, Andaluzia zein Extremadura etxeetan hartuta.
2011ko meategietako kriseilua
Celia Romero (Herrera de Duque, 1995) izango da aurtengo jaialdiko kartel burua. 2011 urteko La Uniongo Meategietako Kantu Txapelketako sariduna da Celia Romero, meategietako kriseilua eskuratu duen 6. emakumea eta baita ere saritutako gazteena. Francis Pinto-k (Badajoz, 1973) lagunduko du gitarrarekin.
Laudioko Algarabia flamenko dantza taldeak eskainiko du jaialdiaren bigarren emanaldia. Manuel Cuevas-ek (Osuna, 1977), iazko jaialdiko kartel buruak, lagunduko ditu kantuan.
2007az geroztik ospatzen da Laudioko flamenko kantu jaialdia Extremadura eta Andaluzia etxeetako bazkideen ekimenez. Flamenkoaren mundu mailako erreferentzia den meategietako txapelketan saritutako kantariekin osatutako programek Miguel de Tena, aurtengo Celia Romeroren maisua, Manuel del Pozo, Niño Bonela eta Pedro Peralta kantariak hurbildu ditu Aiaraldera. Ekitaldiko sarrera salmentarekin eta Udala eta babesle pribatuen ekarpen ekonomikoekin egiten diote aurre programaren finantzaketari.