Laudioko gobernu taldeak Aldai plazan kultura-gune berria eraikitzeko proposamena ezagutzera eman zien gainerako talde politikoei maiatzaren 25ean ospatutako Gobernu Batzordean. Ondorengo prentsaurrekoan, egitasmoaren aurkezpen publikoa egin zuen.
Hilabete eta erdi baino ez da pasa eta eztabaidak Udal Batzako gainerako talde politikoen jarrera kritikoa eta herriko hainbat eragile kulturalen interesa piztu ditu. Gizarte-sareetan ere gaiaren inguruko iritzia emateko ekimenak azaldu dira.
Kultura eragileei eskainitako aurkezpena
Ekainaren 26an herriko 20 eragile kulturalei eskainitako aurkezpenean, udal teknikariek emandako txostenetan oinarritutako informazio teknikoa eskaini zuen gobernu taldeak; Aldai plazako orubearen ezaugarriak, proiektua bideratzeko baldintza juridikoak, arkitektura aldetik bete beharreko baldintzen azterketa teknikoa eta proiektuaren bideragarritasun ekonomikoa bermatzen zuten txostenen laburpena eskaini zuten berton.
Ezaugarri teknikoei dagokienez, besaulki-patioaren toki kopurua, agertokiaren tamaina eta zerbitzu-sarbidearen kokapena edo aretoaren ezaugarri akustikoen inguruko galderak luzatu zituzten talde kulturalek. 300 ikusleentzako tokia, sotoko solairutik zerbitzu-sarbidea izango duen 12 metroko zabalera eta 6 eta 12 metro arteko sakonerako agertokia eta akustika aldetik baldintza egokiak eskaintzen duen proiektua dela azaldu zuten Bilduko ordezkariek.
Bileran Laudiok kultura-azpiegituratan dituen gabeziak utzi zituzten agerian talde kulturalek, besteak beste, entsegutarako lokal falta eta Lamuza parkeko instalazioen egoera kezkagarria. Eztabaida herritar guztiei zabaltzeko proposamenak ere azaldu zituzten bileran.
Oposizioaren jarrera kritikoa
Bilduk antzoki proiektua gizarteratzeko erabilitako prozedurak udalbatzako gainerako taldeen kritikak eskuratu zituen ekainaren 26ko osoko bilkuran. Maiatzaren 25ean Gobernu Batzordean emandako argibideek ez zituzten oposizioko taldeak pozik utzi eta gaia udal batzordeetan sakonkiago aztertzeko eskabideak azaldu zituzten osoko bilkuran.
"BILDUk eragindako marketing eta propaganda estrategia” bezala baloratu zuen EAJk proposamena bideratzeko erabilitako prozedura ondorengo egunetan banatutako prentsa oharrean. Kultura taldeentzat deitutako aurkezpenera gainerako talde politikoak ez dituela gonbidatu leporatu diote ere oposiziotik gobernu taldeari.