Ostegunetik igande bitartean udako solstizio eta San Joan gauaren inguruko ospakizunak izango dira Aiara eskualdeko herri eta auzoetan.
Artziniegan piztuko dute eskualdeko lehen sua 21ean, ostegunean, solstizio egunean, uda garaiaren ongi etorri gisa. Artziniega Museoan jarri dute hitzordua 20:30ean Artziniegako Museoak eta Artea Etnografi Elkarteak. Berton dantzak, musika, sua eta askaria eskainiko ditu Akergorri jaiaren programak.
San Joan suak
Larunbatean San Joan suaren inguruko ospakizunak zabalduko dira eskualdeko gainerako herri eta auzoetan.
Orozkon goiz partean Gorbeiako parke naturaleko ganadu feria eta produktu erakusketa izango da Hegoalde urbanizazioaren inguruan. Pilota partidak 11:30ean hasiko dira eta Orozkoko produktuen dastatzea eskainiko da 12:00etan. Arratsalde partean Orozkoko Agate Deuna eta Gasteizko Dultzinea Abesbatzek kontzertua eskainiko dute San Joan elizan 20:30ean. Piruloren erretzea eta su artifizialak 22:30ean izango dira Hegoalden eta 23:00etan berbena hasiko da.
Laudioko Larrazabal eta Landaluze auzoek San Joan Astobitzako baselizaren zelaian ospatzen duten jaiaren programa ostiralean abiatuko da 22:00etan aurrera Honat taldeak eskainiko duen dantzaldiarekin. Larunbatean, bola jokoa izango da goizean eta arratsaldeko 19:00etatik aurrera haurrentzako jokoak Kirikino taldearen eskutik. 20:00etan Krosa abiatuko da eta ordu berberean Laudioko Musika Bandaren kalejira eta Herriko Plazatik abiatuko den zanpantzarren kalejira iragarrita daude. 21:00etan Honat taldearen erromeria hasiko da eta 22:00etan etenaldia egingo dute suaren jaiari txanda emateko. Gauerdirako bertso saioa iragarrita dago eta 00:30etik aurrera Triki ta Ke taldearen dantzaldia.
Akelarreak
Urduñako Gazte Asanbladak Akelarre eta San Joan sua deitu ditu 22:30etik aurrera Makaldian. Igandean San Joan zelaian, Bizkaiko azoka zaharrena ospatuko da Urduñan. Ganadu azokarekin batera artisautza eta nekazaritzako elikagai azoka izango dira bertan.
Okondon ere Akelarre eta txokolate jana deitu du 20:30ean bertoko dantza taldeak futbol zelai eta bolatoki inguruan. Jaia 19:00etan hasiko da saltxitxak, mairu-pintxoak eta queimada eskainiko duen txosnan eta sua 20:00etan piztuko dute.
Suaren jaia herri eta auzo guztietan
Luiaondon, aste kulturalaren programa barruan, San Joan sua eta txokolate jana egingo dute 21:30ean parkearen aurreko zelaian. Suaren jaia, jakina, Airara udalerriko gainerako herri eta azuoetan ere ospatuko dute. Arakaldon bezperan, barikuan, egurra eta kartoi bilketa deitu dute 18:30ean sua prestatzeko eta zapatuko jaia 21:15ean hasiko da Udaletxe ondoan. Patata tortilla, txorizoa eta txokolate jana ondoren piztuko dute sua.
Amurrion ospakizunak Aresketamendin Banda Txikiak 13:00etan eskainiko kontzertuarekin hasiko dira. 20:00etatik aurrera Koldo taldearen emanaldia iragarrita dago. Arrankudiagako Uribarri auzoan trikitixa eta txokolate jana deitu dituzte suaren jaiaren inguruan.