Kubatarren eta euskaldunen bizipenetatik abiatuta, Euskadi-Cuba elkarteak eta EHNE-Bizkaia sindikatuak elkarlanean martxan duten “Emakumeak, elikadura-subiranotasunaren protagonistak” erakusketa ibiltaria Laudion izango da maiatzaren 21etik ekainaren 1a bitartean.
Josu Trueba basauriarra eta Pau Coll badalonarraren argazki lanen bilduma Kultura Etxean erakusgai izango dute 18:00etatik 21:00etara astelehenetik ostiralera eta 11:00etatik 13:00etara larunbatetan. Kubako Nekazari txikien Elkarte Nazionala eta Euskal Herriko Nekazarien Elkartasuna, EHNE, sindikatuaren Bizkaiko taldearen jarduera dokumentatu dute argazkilariek. Erakunde bi hauek "La via campesina" nazioarteko nekazari elkarguneko kide dira, 1996an ospatutako Elikaduraren Mundu-Gailurrean elikadura-subiranotasuna kontzeptua kaleratu zuen erakundea, alegia.
“Herritar guztien elikatze-eskubidea bermatzeko beharrezkoak diren elikagaiak ekoizteko, banatzeko eta kontsumitzeko politika nahiz estrategia propio eta iraunkorrak definitzeko herriek duten eskubidea”, hala definitzen dute antolatzaileek elikadura-subiranotasuna. Eskubide horren lorpenerako borrokan, emakumeari aitortzen diote protagonismoa. FAO erakundeak eskainitako datuen arabera, emakumeak mundu mailako elikagai ekoizpenaren %70az arduratzen dira baina neoriberalismoak eta patriarkatuak zapaldu eta baztertzen ditu.
Erakusketa Igorre, Agurain eta Gasteizko Judimendi auzoan bisitatu ahal izan da udaberrian zehar. Laudioko Berdintasun Zerbitzuak programatutako ekimen honek Araba eta Bizkaiko Foru Aldundien laguntza ere izan du. Informazio gehiago nahi izanez gero, jo helbide honetara: www.euskadicuba.org. Erakusketa eskatzeko kontaktu bideak: sensibilizacion@euskadicuba.org / 94 415 11 07.
Emakume enpresariak, ekintzaileen eredu
Pertsona Ekintzailearen Nazioarteko Egunaren testuinguruan, "Han eta hemengo emakume ekintzaileak" foruma antolatu du Laudioko Berdintasun Zerbitzuak maiatzaren 22rako, astearterako, 18:30ean Kultura Etxean. Ekitaldia EMAKUNDEk antolatutako 2012ko Berdintasun Foroaren barruan kokatuko da eta Laudioko Udaleko Garapen Agentziaren laguntza izango du.
Foroak emakumeek sortutako enpresa ekimenen esperientzia trukaketa eta esparru horretan aritu nahi dutenei aholkularitza eskaintzea bultzatuko du.
Haurtzaindegi zerbitzua eskainiko dute. 94 403 48 50 telefonoan hartuko dituzte erreserbak ostirala arte.