EAJk mozio bi aurkeztuko ditu martxoaren 26an ospatu behar den Laudioko Udal Osoko Bilkurak azter ditzan. Bilduko Gobernu Taldeak herriko Hiri Antolamendu Plan Nagusiaren garapenerako dituen epeak Hirigintza Batzordean hilabete baten buruan aztergai agertzeko eskaera luzatu dute lehenbizi jeltzaleek. Eztabaida honen harira, HAPN herritarren parte-hartzeaz garatzea helburu izango duen prozesua apirilaren 2. hamabostaldirako abian jarriko dela iragarri berri du Bilduk.
Bestetik, herriko ostalariek kalean terraza eta mahaitxoak jartzeko araudia berrikusteko proposamena aurkez dezala eskatuko dio EAJk Bilduri mozio bidez: “aldaketaren zirriborroa aurkez dezala Osoko Bilkuran eztabaida dadin, lurzoru publikora lotutako trenkada, edo karpa bezalako instalakuntza finkoek eragindako arazoak konpontze aldera eta indarrean dagoen Ordenantzaren artikuluaren interpretazio desberdinek eragindako segurtasun juridikoa ezabatzeko Udalari erreminta-juridiko eraginkorrago bat ematea”.
Iragan legealdiaren amaierako Osoko Bilkurak, 2011ko maiatzean, onartutako Ordenantzak 2009an emandako baimenen berrikuspena eragin du eta herriko ostalari talde batek aldaketak kalte ekonomikoak eragin dizkiola agertu du hedabideetan.
PSEren ordezko-mozioa
PSE taldeak gaiaren inguruko ordezko-mozioa aurkeztu du. Berton, 2011ko irailaren 2az geroztik indarrean den Ordenantzaren balorapena, udal erregistroan jasotako kexa eta eskaeratatik abiatzea proposatzen du; honetarako, apirilean herriko ostalarien, udal teknikarien eta talde politiko guztien partaidetza izango duen lan taldea deitzea proposatzen du. Honez gain, ostalaritzako instalazio hauetan estetika eta praktikotasun irizpide bateratuak bultzatuko dituzten neurriak aztertzea eskatuko du PSEren mozioak.
Azkenik, APILLek gehiegizko ostalaritza zonaldea ezabatzeko egin duen proposamenetik abiatuta, herriko ostalarien kategoria sailkapena berrikusteko prozesua abiatzeko eskaera ere gehitu du mozioan PSEk.
Bigarren mozio batean, Espainiako gobernuak arautu berri duen lanbide arteko gutxieneko soldataren izozketaren aurrean Laudioko Udalak aurkaritza agertzea eskatuko du PSEk. Europar Gutun Sozialak ezartzen duen bezala, gutxieneko soldata soldaten batez bestekoaren ehuneko hirurogeira egokitzeko negoziaketa prozesua zabal dezala eskatu beharko dio Laudioko Udalak Espainiako gobernuari mozioa aurrera ateraz gero.
Kultura eta etxebizitza sozialak
Udal gobernu taldeak kultur eta kirol taldeekin izan dituen bileren berri ematea eskatuko du PSEk Osoko Bilkuran. Luzatu zaizkien hitzarmen proposamenen zehaztapenean ezarri diren diru-laguntza murrizketak ezagutu nahi ditu ere PSEk.
Azkenik Apaloeta urbanizazioan Eusko Jaurlaritzak Udalari alokairuan utzi behar dizkion etxebizitzak ordaintzeko diru-partida eratzea proposatuko du PSEk Osoko Bilkuran.