Arabako Odol Emaileen Elkartea sentsibilizazio kanpaina burutzen ari da Laudion azaroan zehar. "Odola ematea bizitza da" kanpainako kartelak ezarri dituzte herriko kaleetan eta odola emateko arrazoiak eta jakin beharrekoak azaltzen dituzten esku orriak banatu dituzte.
Sentsibilizazio kanpaina azarorako prestatu duten odola emateko egutegiaren lagungarria izango da: azaroaren 7, 17, 21 eta 22an Ardantzazar kaleko Gizarte Etxean izango dira; hilaren 10ean Aretako Santa Ana klubean; azaroaren 14an Latiorroko Gaztela eta Leongo Etxean; 16 eta 23an, Ugarteko La Milagrosa ikastetxean. Guztietarako ordutegia 16:30etik 20:00etara izango da.
Odola emateko ekimena Guardian eta Vidrala enpresetara luzatu dute oraingoan eta urria aldera, Laudioko Lanbide Heziketa Udal Ikastetxeko langile eta ikasleek ere hartu dute parte.
Emaileak helburu
Kanpainaren helburuetako bat osagai anitzeko aferesi emaileak lortzea izango da. Odola emateko prozesu honek odolaren osagai zehatzak, plaketak, plasma edota globulu gorriak bereizten ditu eta ohiko saioek baino denbora gehiago eskatzen du. Odola eman nahi duten guztiek aurreko kontrol medikoa pasa behar dute, 18 urtetik gorakoa eta 66 urtetik beherakoa izan behar dute, eta 50 kg.-ko pisua, gutxienez. Informazio gehiago 900 3003 404 eta www.donantesdesangre.com orrialdean eskura daiteke.
Hilabete bukaeran, 29an, Urduñan izango dira eta abenduan Amurrio eta Artziniegara helduko da kanpaina.