Jendetza bildu da Amurrioko Aresketa Ikastolan Araba Euskarazi hasiera emateko. Txalapartaren doinuarekin batera elkartu dira bertaratutakoak eraikinaren patioaren baitan.
Ekitaldiaren hasieran eskerrak luzatu zaizkie ikastolaren 36 urte luzeetan lanean aritu direnei. Horrekin batera jaialdiaren 33. urteurrena gogoratu dute antolatzaileek, bide luze horretan bidean utzitako lagun euskaltzaleak ahaztu gabe. Gainera, Mendiko Lagunak, Amurrioko Udala eta Eusko Jaurlaritza, besteak beste, aipatu ditu Onintze Guerrak -Aresketa Ikastolako lehendakaria-, haiek gabe Ikastolaren beraren ibilbidea berdina izango ez zela gogoratuz. Momentu hori aprobetxatu du, hain zuzen ere, eraikinak egun dituen beharrak -handiago baten premia, bereziki- asetzeko erakunde berrien laguntza beharrezkoa izango dela esateko. Izan ere, haur hezkuntza lekuz aldatzea ezinbestekoa dela uste da zuzendaritzatik.
Ez da, guztiarekin, jaialdiaren mugarri den euskararen aldeko hitzik faltan izan. Euskara plazara ateratzeko beharraz aritu dira, eta, bide horretan, gaur, hegoaldean, Amurrion Araba Euskaraz ospatzen ari den bezala, iparraldean, Saran, hezkuntza elbidunaren aldeko egunean murgilduta daudela gogora ekarri da.
Hitzon ostean ikasle eta ikasle ohiek hartu dute protagonismoa. Azkeneko horiek izan dira bertaratutakoek egindako borobilaren erdira agertzen lehenak, Sokaide taldearen kanta batez baliatuta dantzaldia eskainiz.
Ondoren txikienen ordua heldu da. Patinatzaileak, ikasle-katea, soinketa, soka saltoa, zirkua, piramidea, buru handiak... tartekatu dira 10 minutu inguru iraun dituen ekitaldi koloretsuan. Amaierako txalo zaparrada emozioen biltzaile nagusia izan da.
Xabier Arrietaren hitzartzea
Ondoren, ordezkari desberdinen hitzartzea heldu da. Arabako Ikastolen arduraduna den Xabier Arrietak eskerrak eman dizkie bertaratutakoei. Ikastolen izaera sozialaz aritu da, asmorik gabekoak direla azpimarratuz. Zentzu horretan, zerbitzu publiko bat aurkezten dutela-eta -Euskal Hezkuntza Sistemaren parte handia izaki- finantzaketa publikoaren beharra agerian utzi nahi izan du. Adibide moduan Trebiñuko La Pueblako Ikastola jarri da, diru laguntza publikorik ez jasotzeagatik, ikasle berrien eskariari aurre egin ezinaren aurrean aurkitzen dena.