Maiatzaren 30eko grebaren harira aurkeztutako balorazio laburrean, eskualdeak eskainitako plantoan parte hartu zuten pertsonak zoriondu ditu aiaraldeko plataformak. Haien ustez, eskualdearen gehiengoak borondatezko ahalegina egin zuen gobernu ezberdinek inposatzen dituzten neurrien kontrako ezezko borobila adierazteko eta eredu ekonomiko eta sozialaren aldaketaren alde egiteko.
Grebarekin bat egin ez zuten pertsonei elkartasuna adierazteko aukera dutela gogorarazi die plataformak. Honen harira, Laudio eta Amurrioko Eroskin gertatutakoa adibiderik larriena dela uste du: “euren elkartasun eza eskualde eta komertzioekiko iraingarria izan zen”. Gainera, patronalak, gobernuek eta ultra kontserbadoreak diren medioek erabiltzen dituzten argudio berdinak erabili izana leporatzen die.
Bukatzeko, Euskal Herri mailan, eskubide sozialen gutuna ekainean lantzen hasiko dela gogoratu du, horren alde borrokatzeko deia eginez. Aiaraldean, berriz, gaur, ekainaren 5ean, Urduñako kultur etxean, 18:30etan, solasaldia antolatu dute “immigrazioa eta emakumeen” egoeraren inguruan, Julen Zulaika eta Emaion emakume taldearen eskutik.