Arabako Biltzar Nagusietan tokiko erakundeen finantzaketa modeloaren inguruko ponentzia prestatzen ari dira. Laudioko Udalak, beste udalekin batera, alegazioak aurkezteko gonbitea jaso eta Martxoaren 27an bidali zituen.
Alegazioekin Laudioren berezitasuna onartua izatea bilatu duela adierazi du gobernu taldeak, horren bidez trataera justuago bat jaso ahal izateko. Zerrendatutakoen artean, kokapen geografikoak indar berezia hartzen du. Izan ere, gainontzeko udalerriengandik urrun egoteaz aparte, komunikabideak eskasak eta zailak direla deritzo udalak. Horri garraio publiko eta azpiegituren urritasuna gehitu behar zaio.
Datu demografikoek ere eragina dute herriaren gestioan. Laudiok, bere tamaina dela eta, Arabako beste herri batzuek bete behar ez dituzten baldintzak bete behar ditu ekipamendu publikoei dagokionez. Zerbitzu hauek eskualdeari baliagarriak izanda ere, udalaren arabera Laudiok ez ditu baldintzak betetzen, herri txikiek adina zerbitzu eskainiz. Gainera, 50.000 biztanle baino gutxiago izanda, ez da finantzazio plangintza berezia egin ahal izateko minimora heltzen. Ondorioz, aipatutako baldintzei udalerriak berak erantzun behar die.
Horregatik, Udalak autonomia munizipalean sakondu eta errekurtso publikoen banaketa bidezkoa ziurtatu behar dela uste du, tokiko erakundeak indartu ahal izateko.