2013ko aurrekontuetan, Laudioko Udalak 23.966.000 euroko diru sarrerak aurreikusten ditu, pasa den urtean baino %8 gehiago. Opor fiskalak direla eta FOFELen emango den igoera puntual baten ondorio da hau. Izan ere, pasa den urteko 9.470.000 eurotatik aurten 10.432.000 euro izatera igaro da.
Diru sarreretan, guztira, 1.760.000 euroko igoera eman da. Udaletik adierazitakoaren arabera, aipatutako kopuruak inbertsioei aurre egitea izango du xede. Hortaz, pasa den urteko 20.750 euroekin alderatuta, 2013an 1.391.000 euro balioko inbertsioak egingo dira. Guztietan indartsuena, Foru Planari dagokiona izango da, 900.000 euro bideratuz.
Gainerako inbertsioak auzoen beharrak asetzera bideratuko dira, gehienbat: Iturralden hobekuntza proiektua, etxe kaleratzeei aurre egin ahal izateko pisu sozialen hobekuntza... Hauetaz aparte aurreko aurrekontuen 700.000 euroko inbertsioa gehitu dela esan du udalak. Gainera laguntza sozialek gora egin dute, talde kultural eta sozialei diru laguntza mantendu zaie eta enpleguaren sustapenerako partida bat gehitu da.
Gastu arruntak igoera txikia pairatuko du, %4a, BEZa eta kontratuen KPI eguneratzea dela eta.
Aurrekontuak lantzeko aurreneko komisioa aste honetan deituko dute. Gaurtik aurrera zirriborroa web orrialdean eskuratzeko aukera egongo da, eta baita udaleko iragarki taulan, 15 egunen buruan laudioarrek ekarpenak egin ditzaten. Norbanakoen ekarpenez gain, pasa den urtean bezala, gobernu taldea talde munizipalekin batuko da, zirriborroa lantze aldera.