Webgunean adierazi bezala, 7 dira Omniak hilaren 28ko osoko bilkuran eztabaidatzeko aurkeztutako mozioak: hiri-altzariak, kantxaren konponketa, herri lokalak, familia ugariak, laneko mobbing-a, Laguntza Sozialen inguruko informazio kanpaina eta talde editorialari dagozkionak, hain zuzen ere.
Hiri altzarien mozioan, politikari, tekniko eta herritarrez osatutako prozesu parte hartzailea aldarrikatzen du, hutsuneak jasotzen dituen informea eratu eta lehentasunak ezarri ahal izateko. Gainera, erabilera publikoekin lotuta, areto futbol, eskubaloi eta hockey-an aritzeko erabiltzen den polikiroldegiko kantxa konpontzeko mozio berezia aurkeztu du.
Herri lokalen auziari dagokionez, aurrenekoaren ildo beretik, hauen erabilerarako erregela komunak adosteko prozesu parte hartzailea beharrezko ikusten da Omniatik.
Laugarren mozioak, familia ugarien kasua biltzen duenak, Eusko Jaurlaritzatik jasotako agindua du hizpide. Bertan, bizigarritasuna bermatzeko pertsona bakoitzeko 15 m2-ko espazio minimoa ezabatzen dela aipatzen du Omniak, gain okupazioaren mugak handituz. Agindu horren bidez, bizigarritasun desegokia duten familiei Babes Ofizialeko Etxea ematea eragozten dela dio Laudioko herri plataformak.
Lanean emandako jazarpenen hazkuntzari aurre egiteko hartu beharreko neurriak eskatzeko, berriz, laneko mobbing-a izenarekin, bosgarren mozio bat aurkeztu du.
Seigarrenak Laguntza Sozialen inguruko informazio kanpaina abiatzea du helburu, hauen inguruko datuak emanez alarma sozialak arindu ahal izateko. Gainera, iruzur posibleei aurre egin beharra aldarrikatzen da puntu honetan.
Azkeneko mozioan, talde editorial bat sortzea proposatzen da, publikatuko diren gaiak erabakitzeko. Hau talde politiko eta herri komunikabide bakoitzeko ordezkari batek osatu beharko du.