Beste urte batez, Laudio Ikastolako hezkuntza jardunaldiak ospatuko dira. XIII. edizioa izango da, eta 0-18 urte bitarteko seme-alabak dituzten gurasoei, zein irakasle, ikasle eta beste profesionalei zabalduta dago.
Gai desberdinak jorratuko dira, adituen laguntzarekin. Hausnarketa prozesu bat ematea du helburu, nork bere bizitzara, lanera eta familia esparrura eraman ahalko dituen estrategiak ezartzen laguntzeko.
Aurten lau saio izango dira: bi euskaraz, bat elebiduna eta azkena gaztelaniaz, aipatutako ordenan. Aurrena, urtarrilaren 21ean izango da, “haurren autonomia bultzatzen dut ala gehiegi ari naiz babesten?” izenburupean. Hizlaria Nerea Mendizabal Psikopedagogoa eta Gizarte eta Haur masajeko hezitzailea izango da. Bigarren saioan, hilaren 22koan, Leire Darreche Pedagogian Doktorea eta Haur Hezkuntzan Magisteritza tituluduna izango da hizlari, “eskola inklusiboa eta aniztasunaz” aritzeko. Hirugarrenean, 23an, “ikaskidetza: elkarrekin ikasten, elkarrekin eraikitzen” izango dute hizpide Mariam Bilbatua Pedagogian Doktoreak, Ana Usabiaga Psikopedagogoak eta Ainara Artetxe Psikologoak. Azkenak, egun bat beranduago, “gurasoak eta nerabeak: nerabezaroaren aurrean bizirauten” jorratuko du, Juanjo Arrasate Gizarte Hezitzailearen eskutik.
Saio denak Laudioko Udaleko gela balio anitzean emango dira, arratsaldeko 17:30etan, 21ekoa salbu, 17:00etan izango dela. Behar duenak haurtzaindegi zerbitzua erabiltzeko beta izango du.