Hilabete batzuk pasa dira Tubos Reunidoseko greban langile batek egindako deklarazioengatik salaketa jaso zuenetik. Hitzotan, ertzainei erreferentzia egiteko “zipayo” izendapena erabili zuen, zeinak, hiztegien arabera, Amerikako tribu batetako kide edota soldatapeko morroia esan nahi duen.
Egunotan Arabako Probintzia Auzitegiak ekintza horrek legea urratzen ez duela ebatzi eta absolbitu egin du. Horren aurrean, Segurtasun Departamenduak harridura erakutsi du; “sententzia judizialei men egin behar bazaie ere, zenbaitetan jendartearen gehiengoak ezin ditu ulertu, zuzenbide estatu batetan denok kondenagarritzat ulertzen ditugun portaerak bermatzen dituztelako”, esan du Estefania Beltranek, Segurtasun Kontseilariak.
Beltranek elkartasuna helarazi dio Ertzaintzari, orokorrean, urtetan “mespretxuzko” termino hori jasan dutenak asko izan direla argudiatuta.
Hala ere, sententzia judizialak onartu behar direla esan badu ere, kasu honetan hartu den erabakiak polizia instituzioarekiko errespetua bermatzen ez duela aipatu du amaieran.
Jarrera berdina erakutsi du ERNEk, Ertzaintzaren sindikatu handienak. “Etengabeko errespetu faltak”, “epaile eta fiskalen erabakien aurreko defentsa falta”… salatu du sindikatuak, beste gauza batzuen artean.