Kirol taldeen garraiorako diru-laguntzak jaitsiera progresiboa izan du azken urteotan. 2006tik 2011ra 39.000 euroko gastuaren %33a ordaindu du Arabako Foru Aldundiak, aurretik %75a ordaintzen zuen bitartean. Azkeneko jaitsieran, baina, laguntza desagertu da. Kaltetuenak, noski, aiaraldeko kirol taldeak ditugu, asteburu gehienetan Gasteiz aldera irteera izaten baitute.
Honen aurrean Arabako Bilduk Biltzar Orokorretan mozio bat aurkeztu zuen, eta aurrera atera, Aldundiak behar ziren neurriak har zitzan. Gainera, aurrera egiteko bultzada eman zuten beste talde politikoek neurri horiek kirolari guztietara zabaltzeko premia gehitu zuten, ezinbesteko mugikortasuna duten norbanakoen alde.
Ekimenak kirol taldeek Euskara, Kultura eta Kirolen komisioan egindako ekarpenetan du jatorria. Bertan bi aukera planteatu zituzten: Bizkaiko federaziora batu edo mobilizazio sozialetan murgildu. Bilduk egoeraren ardura PPrena dela esan du, Aiara Bailararekiko erakusten duen jarrera ezkorra salatuz.
Lortutako akordioaren arabera, diru-laguntzak emate aldera, kilometroen zenbatekoa eta mugikortasun gastuak aurkeztu beharko dira.