Aiaraldeko gazteok garraio publikoa egunero erabiltzen dugu eta honen egoera prekarioa jasan behar dugu uneoro. Guztiontzat dira ezagunak atzerapenak, azken orduko kantzelazioak eta bidaien prezioen igoera.
Renfe C-3 aldiriko trenen egoera kaxkarra da. Inbertsio milioidunak saltzen dizkiguten arren, egunerokotasunean aldiriko zerbitzuak ez ditu gazteon beharrak asetzen. Astebururo herriz-herriz joateko ordutegi ratioa murriztea, gaueko trenak ezabatu izana edota azken orduan tren zerbitzua bertan behera uztea egoera horren adibide garbiak dira.
Autobus zerbitzuaren egoera ere antzekoa da. Gasteizera, Murgiara… ikastera edota lan egitera goazen gazteok Alavabus erabiltzen dugu. Ikasle askoren ordutegiak ez du bat egiten autobusaren ordutegiarekin, askotan aurrerapen handiekin hartu behar izaten ditugu klasera joateko.
Jarraituz, garraio publikoak prekario bihurtzen du herri txikietako gazteon egoera, aldiriko bus zerbitzu murriztua dela eta. Asteburuetan Artziniegatik Amurriora joateko bakarrik 4 bus eskaintzen dira.
Gazteok gure bizitzak duintasunez aurrera eramateko beharrezko zerbitzu bat da garraioa. Horregatik, premiazkoa da garraio publikoaren maiztasuna handitzea, zerbitzua zabaltzea eta prezio duinak ezartzea.
GAZTEOK EUSKAL HERRIAN BIZITZA DUINAK BEHAR DITUGU!
BATU BIZITZEN ALDEKO BARRIKADARA!