Amurrioko Udalak partaidetzan oinarritutako AmurriokoEKIN aurrekontuaren bigarren edizioa apirilean jarri zuen martxan. Proposamenak aurkezteko hiru hilabete eta erdi igaro ondoren, maiatzean amaitu zen ekarpenak egiteko epealdia, eta 320 proposamen jaso dira. Proiektuaren lehenengo fase honetan 197 pertsona izan dira euren proposamenak herritarren esku jarritako lau bideak erabiliz egin dituztenak: on line bidez; Udaletxeko, Kultur Etxeko, kiroldegiko eta Nagusien Etxeko postontziak; udalerriko zenbait gunetan dauden informazio puntuak; eta saio bat Zaraobe institutuan.
Udal proiektuari aurkeztutako ekarpenen artean, zirkulazioa hobetzea, erabiltzen ez diren eraikinen zaharberritzea, aparkatzeko guneak prestatzea edo kirol guneak hobetzea aipa daitezke, beste batzuen artean. Une honetan, prozesua, proposamenen bideragarritasun teknikoaren eta ekonomikoaren balorazio fasean dago, ondoren, urrian, proposamenak lehentasunen arabera antolatzeko.
218 proposamen balorazio fasean
5 baino ez dira prozesutik kanpo geratu diren proposamenak, ez zituztelako gutxieneko eskakizunak betetzen, Amurrion erroldatuta egotea eta 16 urtetik gorakoa izatea, hain zuzen ere. Aurkeztutako proposamenen artean, batzuk antzekoak edo berdinak ziren eta, ondorioz, 125 proposamen 28tan bateratu dira. Bateratze hori, prozesuaren jarraipen zehatza egiten ari den herritar boluntario taldearekin adostu, eta proposamena egin zuten pertsonekin kontrastatu da.
Beraz, azkenean balorazio fasera igaroko diren proposamenak 218 dira. Urrian, bideragarritasun teknikoaren eta ekonomikoaren balorazio fasea gainditu duten proposamenak aurkeztu eta lehentasunen arabera antolatuko dira.
www.amurriokoekin.eus webgunean proposamen guztien zerrenda argitaratuko da, kontsultatzeko. Pertsonaren batek informazio gehiago behar badu, Partaidetza Zerbitzuarekin harremanetan jarri ahal izango da (partehartzea@amurrio.eus, 945 891 161).