Kultur sorkuntza Aiaraldean

La Casonak uztailaren 3an irekiko du erakusketa aretoa, Raisa Alavarekin

Erabiltzailearen aurpegia

Erakusketak, Artiumek eta Arabako Foru Aldundiak bultzatutako  Eskualdea programaren barruan dagoen Fotonovela proiektuko piezak bilduko ditu. Erakusketak, azaroan eta abenduan artistak Kultur Etxean eman zituen tailerretan sortutako piezak ere jasoko ditu.

Amurrioko La Casonak, Raisa Álava herriko artistaren erakusketa jasoko du uztailaren 3tik aurrera. Lehenagorako aurreikusita zegoen arren, Covid-19ak sortutako egoera dela eta, atzeratu egin behar izan zen. Artiumek eta Arabako Foru Aldundiak bultzatutako Eskualdea programaren barruan dagoen erakusketak Fotonovela proiektuko piezak bilduko ditu.

Artistak aurkezten duen erakusketa komikiarekin eta argitalpenaren munduarekin dago erlazionatuta. Bi jarduera horiek oso presente daude bere sorkuntza jardunean. “Aktoreen argazkiak atera beharrean, zeramikekin egiten dut. Horrela, dena erlazionatuta geratzen da: komikia, argitalpen prozesua eta zeramika-instalazioa. Lanaren prozesuan zehar, hori kontuan hartu barik, gidoi bat idazten dut, dena elkarrekin erlazionatuta geratu dadin, horrela, dena konektatu) eta erakusketa aretoan dena bi dimentsiokoa eta hiru dimentsiokoa izan dadin”, azaldu du Álavak.

Artistak, proportzioaren eta konposizioaren kode tradizionaletatik urruntzen den lengoaia berritzailea proposatzen du. “Marrazkian oinarrituta, batez ere komikitik datozen hainbat elementu erabiltzen ditut. Forma bakoitza aletzen eta banakatzen saiatzen naiz, grafia edo elementu figuratibo formako kode berri bat asmatu arte. Ariketa horri esker, narratiba modu berriak sortzen saiatzen naiz, ausazkotasunaren eta zentzurik ez duenaren bitartez”, gaineratu du.

Artistaren lanekin batera, azaroan eta abenduan Kultur Etxean eman zituen tailerretan sortutako piezak ere bilduko ditu erakusketak. Artistak azaldu duenez, tailerren bitartez “Amurrioko bizilagunak proiektuaren protagonista sentitzea bilatzen dut”.

Erakusketa uztailaren 31ra arte egongo da ikusgai La Casonan, egunero, astelehenean izan ezik, 10:00etatik 14:00etara eta, asteartetik ostiralera, baita 17:00etatik 19:00etara ere.

Mario Paniegoren Sin rumbo fijo

Eskualdea programaren barruan dago, eta Mario Paniego artista amurrioarrak Gorbeialdeko koadrilan seinaleztatutako mendi ibilaldi batzuetan egindako eta gogoetan oinarritutako esku-hartze artistikoetan zentratzen da. Ekainaren 27an Oroko Santutegira irteera antolatu da, eta bertan, Sin rumbo fijo proiektuaren aurkezpena egingo da. Hainbat geldialdi izango dituen 6 kilometro inguruko ibilbide zirkularra egingo da. Irteera horretan parte hartzeko beharrezkoa da izena ematea. Horretarako, eskualdea@gmail.com helbidera bidali beharko dira izena eta abizena, inskripzioa egiteko.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide