Amurrio Futbol Taldeak, Kaskagorri Amurrio Futbol Taldeak eta Etorkizuna Aialako Futbol Taldeak, Amurrioko Udalarekin batera, lankidetza hitzarmena sinatu dute gaur goizean, udalerrian futbolean aritzeko egitura garatzeko helburuarekin. Gaur sinatutako akordioak jarraipena ematen dio duela urtebete hiru taldeen artean hartutako konpromisoari. Konpromiso horretan, Amurrioko egungo eta etorkizuneko belaunaldientzat ilusioz betetako ikuspegia eta horizonte komuna definitzeko konpromisoa hartu zuten.
Hitzarmenak hiru urteko indarraldia du, eta, besteak beste, helburu hauek ditu: parte-hartzaileei egitura bat ematea futbolaren jardunbidea antolatuz eta sustatuz, eta epe ertain eta luzerako noranzko biko kirol-proiektua ezartzea, Amurrio Taldea etxeko jokalariz hornitzeko eta amurrioar gazteak taldearen bitartez kirolean aritu ahal izan daitezen.
Gizarte arloko funtzioari emango zaio lehentasuna; horretarako, planifikatutako kalitatezko lana proiektatuko da, eta horren bitartez, etapa desberdinetako futbol-mailetan orientatu ahal izateko eta euren prestakuntza-prozesuetara egokitzeko irakaskuntza emango zaie haurrei.
Horrez gain, akordioak, harrobi osoaren funtzionamenduaz arduratuko den prestakuntzarako futbolaren kirol koordinatzailearen figura sortzea ere jasotzen du. Hiru erakundeek, teknikarientzat, kirolarientzat eta entrenatzaileentzat urteroko prestakuntza plana egiteko konpromisoa ere hartu dute, atzemandako beharrei erantzunez.
Amurrio Taldearen aurreko sentimendua
Beste puntu garrantzitsuetako bat oinarrizko futboleko taldeetan eta Amurrio Taldean parte hartzen duten neska-mutilen arteko lotura sendoa sortzea da, Amurrion futbol sentimendua sortuz. Horretarako, pixkanaka, Kaskagorri eta Etorkizuna taldeetako ordezko ekipazioa Amurrio Taldekoa izango da. Gainera, neska-mutilak Amurrio Clubeko bazkideak izango dira doan, Basarten jokatuko diren Amurrioko 1. taldeko partidetan harrobiko jokalariak baloi-biltzaile gisa aritu ahal izango dira, eta eguraldi onak horretarako aukera ematen duenean, atsedenaldian partidatxoak antolatuko dira.
Emakumezkoen futbola bultzatzea da akordioaren beste oinarrietako bat. Bertan, Etorkizuna taldeak modu aktiboan egingo du lan Amurrion emakumezkoen talde lerro bat martxan jartzeko, gaur egun Etorkizuna taldeko futbol-eskola osatzen duten neskatoek eta interesa izan dezaketen beste batzuek goi-mailako kategorietan kirola egiten jarraitzeko aukera bermatuta izan dezaten.