Amurrioko Udalak eta Euskal Administrazio Publikoaren sistemari atxikitako beste erakunde batzuek jaulkitako helbideratu gabeko ordainagiriak errazago ordaintzeko, Eusko Jaurlaritzak “MiPago Wallet” aplikazio mugikorra sortu du. Trafikoko isunak ordaintzeko aukera ere emango du.
Tresna horri esker, barra-kodea edo ordainagiriaren QR kodea irakurriz egin daiteke ordainketa. Aplikazioa, telefono mugikorrean eraman daitekeen diru-zorro digital bat da, eta herritarrek modu seguruan egin ditzakete euskal administrazio publiko atxiki batekin erlazionatutako ordainketa errepikariak eta noizbehinkakoak.
Aplikazioan erregistratzea
Tresna berri hori erabili nahi duen erabiltzaileak bere burua erregistratu eta kreditu-txartel bat lotzeko prozesu bat baino ez du egin beharko. Une horretatik aurrera, sistema horri atxikitako edozein euskal administrazio publikok jaulkitako ordainagiriak klik bakarrean ordaindu ahal izango ditu, aldeek txartelaren zenbakia jakitea ekidinez.
Sistema hori konfiguratzeko, ordaintzeko erabiliko den txartelaren datuak sartu beharko dira. Mikroordainketen (30 eurotik beherako ordainketak) kasuan, ordainketa-prozesua 'klik bakarrera' sinplifikatzen da, autentifikazio-mekanismo indartuak dituzten txartel-zenbakiak sartu behar ez izateko. 30 eurotik gorako ordainketetarako, entitatearen autentifikazio indartuko mekanismoak gehitu dira.
“MiPago Wallet” aplikazioaren bidez ordain daitezkeen udal-zergak hauek dira: Udal hilerriko Mantentze Zerbitzua emateagatiko tasa, Erabilera Publikoko Mendietan larreak aprobetxatzeagatiko tasa, Hiri-hondakin solidoak – Zaborrak biltzeagatiko tasa, Udal Landa-higiezinak Erroturatzeagatiko tasa, Bide publikoa kartelekin okupatzeagatiko tasa, San Anton Merkatuan postuak jartzeagatiko tasa, Trakzio mekanikoko ibilgailuen gaineko zerga, Hiri-izaerako ondasun higiezinen gaineko zerga, Trafiko isunak, Ibilgailuen sarrerarengatiko tasa eta Aparkaleku-erreserba – Ibiak. Ekonomia-jardueren gaineko zerga eta bide publikoa mahai eta aulkiekin okupatzeagatiko tasa.
Gainera, maiatzetik, Amurrioko Udalak kutxazain automatiko bat du, arestian aipatutako aldizkako udal-zerga guztiak ordaintzeko. Herritarrentzako Arreta Zerbitzuaren (HAZ) ordutegi berean erabil daiteke, hau da, 07:45etik 15:00etara, astelehenetik ostiralera