Zer ulertzen dugu zaintza gisa? Definiziotik hasita, ez da erraza izaten. Gure ingurunearen zaintzatik, bizi garen herri edo mundutik hasi, eta gure gorputzaren zein komunitatearen zaintzaraino; eredu berri batera egin behar da jauzi. Zaintzan fokua jartzeak ekonomia eta kapitala erdigunean dituen egungo eredutik pertsonak, gizartea, komunitatea eta ingurumena erdigunean dituen eredura aldatzea esan nahi du. 2019. urtean hasi zen udalaren barruko lan prozesua, zainketaren ikuspegia udalaren ekintzak gidatzeko itsasargi bihurtzeko helburuarekin.
Ez da talde itxia. Aitzitik, irizpideak definitzeko prozesuan aurrera egin ahala, ikuspegi desberdinak txertatu ahal izatea espero da. Udal politikan eragin nahi dugu, udaletik egiten diren ekintza guztietan, zerbitzuetatik hasita diru-bilketaraino. Udal eskumenen barruan, administrazio logika publiko-pribatutik logika publikoago, sozialago eta komunitarioago batera igaro ahal izateko, pertsona guztiok zaintzeko eta zainduak izateko eskubidea dugula ahaztu gabe.
Horretarako, edozein udal plan, zerbitzu eta ekintza diseinatzerakoan kontuan hartu beharko diren printzipio eta irizpide batzuk definitzen ari gara. Adibidez, irisgarritasuna, autonomia, aniztasuna, trantsizio energetikoa, ekonomia soziala eta solidarioa, hurbiltasuna, elikadura subiranotasuna, ekitatea, enplegu duina eta abar.
Izan ere, bizitza erdigunean jartzeak hiri antolamenduari, herritarren parte hartzeari edo komunitatea biziberritzeari arreta jartzea suposatzen du, baita gizarte zerbitzu zein kolektibo zaurgarrien arretari lotutako baliabideak hornitzea ere. Horregatik, Zaintza Talde Eragilea Amurrioko Udal arlotako arduradunek eta alkatetzak osatzen dute. Talde honek hartzen du bere gain zaintza politikak tokiko ekintzetan txertatzeko eta zeharkakotzeko prozesua pilotatzeko erantzukizuna, jarraitu beharreko ibilbidea proposatuz, eta lortutako emaitzei buruz hausnartuz.
Helburu orokorra irizpide batzuk zehaztea da, ondoren Amurrioko udalaren jarduketan zainketen ikuspegia zenbateraino txertatu den diagnostikatzeko, eta jarraitu beharreko ibilbide orriaren zein autoebaluaziorako tresna praktiko baten definizioa bideratzeko.
Bizitza erdigunean jartzeak epe luzerako prozesu bat eskatzen du, udal langileen sentsibilizazioa eta gaikuntza barne. Horretarako, Udalak ikerketa ekintza parte hartzailearen (IAP) printzipioei lotutako lan egiteko modu bat planteatzen du. Tresna horrek aukera ematen du adostasunerako formulak bilatzeko zaintzaren kontzeptuari eta haren irizpideei jarraituta.
Finean, zaintza ikuspegia udal politiketan eta ekintzetan txertatzearen alde lan egitea, asmo handiko apustu eraldatzailea da; bizitza erdigunean jartzekoa, eta talde eragiletik politikarientzat eta teknikarientzat baliagarria izango den proposamen bat garatzen saiatzen ari gara, pertsona guztiekin atsegina izango den Amurrio bat sustatuz, gure inguruan ahalik eta modu zoriontsu zein osasungarrienean bizitzeko aukera emango diguna, pertsonen beharrak eta lehentasunak kontuan hartuta.