Amurriok gazteen egoera aztertzeko diagnostikoa egin du

Erabiltzailearen aurpegia

Diagnostikoa gazteen parte-hartze prozesu batean oinarritu da, eta Gazteria Planaren aurreproiektua eraikitzeko oinarria izango da.

Amurrioko Udalak udalerriko gazteen egoerari buruzko diagnostikoa egin du, 2017an egindako aurreko azterlanean bildutako informazioa eguneratzeko eta zabaltzeko. Azken hiru hilabeteetan lantzen ari den gazteen partaidetza-prozesuan oinarrituta dagoen diagnostikoa Gazteria Planaren aurreproiektua eraikitzeko oinarria izango da.

Amurrioko Udaleko gazte-zerbitzu berriak bere lekua eman nahi die gazte-politikei Udalean. Horretarako, Amurrioko Udalaren gazte-diagnostikoa eguneratu behar izan da, udalerriko gazteen errealitatea ezagutzeko eta horretan esku hartzeko. Era berean, informazioa biltzeko lehen fase horrek, ondoren, gazteek diagnostiko-txostenean planteatutako premiekin bat datorren programa definitzeko eta diseinatzeko balioko du.

“Amurrioko gazteen azken diagnostikoa egin eta kolektibo horrentzako udal-zerbitzu espezifikoa abian jarri zenetik 5 urte igaro direnean, funtsezkoa da diagnostiko hori eguneratzea, udaleko sail berri horretatik gazte-politikak aplikatzeko abiapuntua izan dadin”, azaldu du Txerra Molinuevo Amurrioko alkateak.

Informazioa biltzeko prozesua

Diagnostiko horrek gazteen, elkarteen eta talde antolatuen ikuspuntua jasotzen du, bai eta gazteen egungo egoeraren berri duen beste edozein eragilerena ere. Informazioa biltzeko metodologiari dagokionez, bileren eta galdera-sorten bitartez gauzatu da. Bilera eta galdetegi horietan gazteentzat garrantzitsuak diren gaiak jorratu dira, aisia, kultura, kirola, ekipamenduak, osasuna, parte-hartzea, prestakuntza eta emantzipazioa, besteak beste.

Guztira, aurrez aurreko 20 elkarrizketa baino gehiago egin dira udalerriko elkarte eta taldeekin, eta 220 galdetegi bete dira, hiru adin-tartetara egokitutako hiru mota: 12 eta 16 urte bitartekoak, 17 eta 24 urte bitartekoak eta 25 eta 30 urte bitartekoak.

Azterlanaren ondorio orokorrek planteatzen dutenez, gazteen ikuspegia kulturaren, kirolaren eta aisialdiaren programazioan txertatu behar da, udal-ekipamenduak haien beharretara egokitu, eta orain arte kolektiboarekin erabili diren komunikazio-bideak berrikusi, udalaren eta gazteen arteko partaidetza eta lankidetza sustatzeko. Era berean, emantzipazioari, etxebizitzari eta enpleguari buruzko hainbat erakunde, organismo edo/eta entitateren baliabideak bideratu eta ezagutaraziko dituen informazio- eta orientazio-zerbitzu berria garatu behar da, gazteentzako baliabide guztien erabilera bermatzeko eta egungo ezjakintasuna edo desinformazioa saihesteko.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide