Amurrioko Udalak eta Arabako Gurutze Gorriak lankidetza-hitzarmen berri bat sinatu dute esku-hartze sozialaren eta herritarren babesaren arloan elkarrekin lan egitea indartzeko. Joan den maiatzaren 20an, Txerra Molinuevo alkateak eta Jesus Cantero Gurutze Gorriko Batzorde Probintzialeko presidenteak sinatu zuten akordioa, eta bi erakundeek herritarren ongizatearekin duten konpromisoa azpimarratzen dute, bereziki kolektibo ahulenen ongizatearekin.
Hitzarmena 2025eko abenduaren 31ra arte egongo da indarrean, eta udalaren 18.000 euroko ekarpen ekonomikoa aurreikusten du, udalerrian zenbait ekintza sozial partzialki finantzatzeko. Berrikuntza nagusien artean, nabarmentzekoa da jai-ekitaldietarako beharrezkoak diren prebentzio-zerbitzu sanitarioak sartu direla, herritarren segurtasunerako funtsezko estaldura txertatuz ospakizun eta ekitaldi jendetsuetan.
Era berean, bikoiztu egin da haur eta gazteentzako proiektuetara bideratutako zenbatekoa, 4.000 eurokoa izatera igaro baita. Horrela, Udalak tokiko gazteak babesteko, parte hartzeko eta garatzeko inguruneak sustatzearen alde egindako apustua berretsi da. Horri gehitu behar zaio 5.000 euroko zuzkidura Gurutze Gorriaren egoitza mantentzeko eta 9.000 eurokoa aipatutako prebentzio-zerbitzuak martxan jartzeko.
Akordioak, halaber, baterako jarraipen-mekanismoak ezartzen ditu, hitzartutako helburuak betetzen direla ziurtatzeko, bi erakundeek arduradun teknikoak eta politikoak izendatuz.
"Gurutze Gorriarekin egindako hitzarmen honek, dagoeneko fruituak ematen zituen lankidetza indartzeaz gain, zabaldu eta gure udalerriaren egungo beharretara egokitzen du. Ahalegin handia egin dugu haurrei eta gazteei zuzendutako proiektuetan egiten den inbertsioa bikoizteko, gaztetatik haiekin lan egiteko botere eraldatzailean sinesten baitugu ", adierazi du Laura Fernández Gizarte Ekintza eta Osasuneko zinegotziak.