Amurrioko Udalbatzak hasierako onarpena eman zion 2025eko ekainaren 26ko osoko bilkuran Udaltzaingoaren Araudi Erregulatzaile berriari. Dokumentu honek aurrerapauso erabakigarria dakar udaltzaingoaren modernizazioan, zehazki arautzen baititu jardun-printzipioak, egitura antolatzailea, funtzioak eta polizia-langileen eskubide eta betebeharrak, guztiak egokituta udalerriaren egungo beharretara eta aniztasuna eta berdintasuna bezalako balioekin konprometitutako gizarte batera.
Onartutako araudiak indartu egiten du udaltzaingoaren izaera zibila, argitu egiten du barne-funtzionamendua eta zehazten ditu bere eskumenak, bai administrazio- eta justizia-arloetan, bai herritarren babesaren esparruan. Horrez gain, hurbileko harremana sustatzen du herritarrekin, eta betebehar bihurtzen du inpartzialtasunez, osotasunez eta errespetuz jardutea une oro. Berariaz aitortzen da udaltzainek zerbitzu-jarrera izan behar dutela, eta saihestu behar dituztela jokaera arbitrarioak, gehiegikeriak eta diskriminazioa, betiere pertsonen eskubideak eta duintasuna zainduz.
Araudi berriaren alderdirik esanguratsuenetako bat da genero-ikuspegia eta diskriminaziorik ezaren printzipioa zeharka txertatzea. Indarkeria matxistaren biktimak eta LGTBIQA+ kolektiboko pertsonak artatzeko betebehar zehatzak ezartzen dira, Eusko Jaurlaritzaren indarreko legediari eta Aiarako Kuadrillaren nahiz Amurrioko protokoloei jarraikiz. Era berean, arreta integrala eta koordinatua bermatzeko neurriak jasotzen dira, biktimizazio bikoitza saihesteko eta polizia-kidegoen eta gizarte-zerbitzuen arteko lankidetza ziurtatzeko.
Testuak jasotzen du, halaber, komunikazio guztietan (ahozkoetan zein idatzizkoetan) hizkuntza ez-sexista eta inklusiboa erabiltzeko betebeharra, eta aniztasun bisuala sustatzen du material instituzionaletan. Etengabeko prestakuntza zerbitzuaren oinarri gisa ezartzen da, arreta berezia eskainiz genero-berdintasunari, indarkeria matxistaren prebentzioari, euskalduntzeari, udal ordenantzen ezagutzari eta kultura-aniztasunari.
Antolaketa ikuspegitik, araudiak modu argian definitzen du udaltzaingoaren hierarkia-egitura, baita kategoria bakoitzaren sarbide, promozio eta funtzio zehatzak ere. Halaber, udalerriaren tamainara eta beharretara egokitutako plantilla izateko beharra jasotzen du, eta lan-txandak eta ordutegiak zerbitzuaren errealitatera egokitzeko plangintza aurreikusten du.
Araudi hau hasiera batean onartuta, Amurrioko Udalak berresten du udaltzaingo moderno, eraginkor eta balio demokratikoekin, justizia sozialarekin eta berdintasunarekin estuki lotutako baten aldeko apustua. Araudi honek erakusten du segurtasun publikoa pertsonen zerbitzura egongo den eredua eraikitzeko borondate instituzionala, egungo erronkei egokitua, giza eskubideak errespetatuko dituena, bizikidetza sustatuko duena eta gizarte seguruago, inklusiboago eta kohesionatuago baten alde aktiboki lan egingo duena.