Amurrioko Udalak gaur goizean egindako ezohiko osoko bilkuran onartu du Arabako Foru Aldundiari finantzazioa eskatzea udalerriko hiri-kalitatea eta ingurumen-jasangarritasuna hobetzea helburu duten bi proiektu garrantzitsu gauzatzeko. Biak proposatu dira Obra eta Zerbitzuen Foru Planaren (PFOS) 2026-2027 Programan sartzeko.
Aurreikusitako jarduketek — hondakin-uren saneamendua eta Mendiko kaleko zati bat urbanizatzea — 1,6 milioi eurotik gorako inbertsioa dute guztira, eta herritarren benetako beharrei erantzuteko diseinatu dira, udalaren txosten teknikoen abalarekin.
Isurketak ezabatzea Markijanan: ingurumenarekiko konpromisoa
Lehenengo jarduketan, Markijanako zonan hondakin-urak isurtzeko hainbat puntu ezabatuko dira, eta horiek HUAren (Hondakin Uren Araztegia) kolektore-sarera konektatuko dira. Esku-hartze horren aurrekontua 1.153.717,09 eurokoa da, eta helburu nagusia da hondakin-uren ingurumen-inpaktua murriztea eta herriko saneamendu-sistema hobetzea.
Udalak proiektu hau 2026-2027 PFOSaren bidez kofinantzatzeko eskatu du, eta laguntza lortuz gero, hurrengo udal-aurrekontuetan beharrezkoak diren baliabide ekonomikoak sartzeko konpromisoa hartu du. Era berean, indarrean dagoen foru-legeriak eskatzen duen araudi tekniko eta urbanistiko guztia betetzen dela bermatu da.
Mendiko kalearen urbanizazioa: promesa bete da bizilagunekin
Onartutako bigarren proiektuak Mendiko kaleko 42 eta 56 zenbakien arteko zatia osorik urbanizatzea aurreikusten du, 504.061,78 euroko aurrekontuarekin.
"Eragin teknikotik harago, proiektu honek erantzuna ematen dio duela 40 urte inguruko bizilagunekin hartutako konpromisoari. Herritarrekiko konpromisoak gauzatu egin behar dira, eta proiektu hau horiek betetzeko erakundeen borondatearen erakusgarri da. Era berean, udal-gobernuko taldearen Agintaldi Planean jasotako jarduera da, eta horrek hiri-ingurunea hobetzeko konpromiso politiko eta soziala indartzen du ", adierazi du Amurrioko alkate Txerra Molinuevok.
Ekimen horiekin, Amurrioko Udalak plangintza arduratsua egiteko, herritarren eskaerak aktiboki entzuteko eta foru erakundeekin lankidetzan aritzeko borondatea berretsi du, herritarren eguneroko bizitzan eragin zuzena duten obrak egiteko.