Amurrioko Udalak abian jarri du udal pilotalekua eraberritzeko eta handitzeko prozesua, herriko kirol eta kultur instalaziorik esanguratsuenetako bat baita. Zazpi hamarkada baino gehiagoko historia duen azpiegitura honek funtsezko lekua izan du amurrioarren bizitzan, bai kirol-jarduerarako bai kultura-ekitaldietarako, eta komunitatearen erdigunean kokatzen da.
Proiektuak espazio nagusien berrikuntza integrala aurreikusten du, besteak beste, harmailena, aldagelena, komunena eta tabernarena, frontoia leku modernoagoa, funtzionalagoa eta egungo beharretara egokitua izan dadin. Esku-hartzeak, halaber, instalazioa behar berrietara egokitzea ahalbidetuko du, Amurrioko kirolaren eta kulturaren topagune gisa duen eginkizuna indartuz.
Ekimena Udalak udal-azpiegiturak modernizatzeko duen estrategia zabalago baten barruan kokatzen da. Proiektua idazteko eta obrak zuzentzeko laguntza teknikoa kontratatzeko espedientea hasi da. Fase honetako aurrekontua 150.000 eurokoa da, eta obra egiteko finantziazioa, milioi bat euro ingurukoa, Arabako Foru Aldundiarena da, 2024-2025eko Obra eta Zerbitzuen Foru Planaren bidez.
“Jarduketa honekin, Udalak ez du soilik instalazio historiko bat mantendu nahi, baizik eta berritu eta gaur egungo eskakizunetara egokitu ere. Helburua da pilotalekuak erreferentziazko espazio izaten jarraitzea, guztiontzat irekia eta bai kirol jarduera zein kultur eta gizarte ekitaldiak hartzeko prestatua”, adierazi du Amurrioko alkateak, Txerra Molinuevok.