Amurrio Berrikusik bi kanpaina berri jarriko ditu martxan udazken honetan, urriaren 1etik 31ra bitartean. Bi helburu nagusi izango dituzte: alde batetik, herritarren iritzia ezagutzea tokiko merkataritzari buruz, eta bestetik, udalerriko establezimenduetan erosketa gehiago sustatzea.
Lehen ekimena, “Zuek erantzun, guk ikasi”, iritzi-inkesta bat da, Amurrio Berrikusi aplikazioan eskuragarri egongo dena. Inkesta horren bidez, erabiltzaileen iritziak, esperientziak eta iradokizunak bilduko dira, Amurrioko merkataritza-sarea sendotzen jarraitzeko asmoz. Inkesta osatzen duten pertsona guztiek Udazkeneko zozketan parte hartzeko aukera izango dute, eta, gainera, 100 euroko balioa duten tokiko produktuen bi saski zozketatuko dira parte-hartzaileen artean.
Bestalde, Udazkeneko zozketak 2.000 euroko erosketa-txartel bat banatuko du, Amurrio Berrikusirekin bat egindako establezimenduetan erabiltzeko. Parte hartu ahal izateko, beharrezkoa izango da urriaren 1etik 31ra bitartean egindako erosketen tiketak aplikazioan igotzea. Erositako 20 euro bakoitzeko parte-hartze bat lortuko da, eta “Zuek erantzun, guk ikasi” inkesta erantzuteak parte-hartze gehigarri bat emango du.
Bi kanpainen zozketak azaroaren 5ean egingo dira, eta sariak banatzeko ekitaldia azaroaren 14an ospatuko da Amurrioko Udaletxean, irabazleak eta tokiko merkataritzaren ordezkariak bilduko dituen ekitaldi batean.
Ekimen hauek guztiak Amurrio Berrikusiren 2025eko Fidelizazio Kanpainaren parte dira, urtean zehar erabiltzaileen inplikazioa eta leialtasuna saritzeko hainbat ekintza bultzatu baitira. Nabarmentzekoak dira Amurrio Berrikusi Lehen Urteurreneko Zozketa, Zuek Erantzun, Guk Ikasi, Udazkeneko Zozketa eta Gabonetako Erakusleihoen Gymkana.
Lau kanpainetan parte hartzen duten eta bakoitzaren baldintzak betetzen dituzten pertsonek automatikoki parte hartuko dute 100 euroko bost erosketa-txartelen azken zozketan, 2025eko abenduaren 15ean egingo dena. Sariak 2025eko abenduaren 31ra arte trukatu ahal izango dira plataformarekin bat egindako establezimenduetan.