Atzo, Amurrioko eta Urduñako alkateek Renfe eta Adif-eko arduradunekin, herritarren kexak, iradokizunak eta eskaerak helarazteko bilera izan zuten, azken hilabeteotan C3 lineako zerbitzuak izan dituen gorabeheren aurrean.
Bileran, udal ordezkariek herritarren kezka nagusiak azaldu zituzten, batez ere ordutegien aldaketen eta obrek eragindako eragozpenen inguruan, eta Renfe zein Adif-i tren zerbitzua hobetzeko neurriak har ditzatela eskatu zieten bitartean sarean egiten ari diren lanak amaitu arte. Planteatutako gaien artean, goizeko lehen orduko eta gaueko azken orduko trenen ordutegiak berrikusteko eta egokitzeko beharra nabarmendu zen, Bilbora joateko eta etortzeko mugikortasuna errazteko. Halaber, autobus bidezko ordezko zerbitzuak ezartzea eskatu zen obrek edo pilaketek eragindako tarteetan, baita trenak geldirik daudenean herrigunean sortzen dituzten eragozpenak murrizteko konponbideak bilatzea ere, bereziki gaueko ordutegietan.
Bestalde, Renfeko ordezkariek azaldu zuten C3 lineako arazoen arrazoi nagusia Ollargan eta Basaurin egiten ari diren obrak direla. Azaldu zutenez, Basauriko tartean bide bakarra dago erabilgarri, eta horrek pilaketak eta atzerapenak eragiten ditu bai aldiriko trenetan, bai merkantzia, Alvia eta tren pribatuetan ere. Era berean, Renfek argitu zuen ez dagoela ez tren faltarik ezta makinista faltarik ere, eta irisgarritasunarekiko konpromisoa berretsi zuen, baieztatuz bainudun eta irisgarriak izango diren tren berriak txertatzeko proiektua martxan jarraitzen duela.