Amurrioko Udaleko Tokiko Gobernu Batzordeak amiantoaren udal-errolda egiteko zerbitzuaren esleipena onartu du. Errolda honek Udalerriko eraikin, instalazio eta kokaleku publiko zein pribatuetan amiantodun materialik (MCA) egon daitekeen jakiteko tresna da.
Errolda egiteko, aurretiazko eta oinarrizko etapak hartzen dira kontuan, IHOBEk egindako EAEko amiantoaren udal-erroldak egiteko gida metodologikoan ezarritako irizpideei eta amiantoaren lokalizazioari eta diagnostikoari buruzko UNE 171370-2 arauari jarraituz.
Lehenengo fasean, udalerriko eraikin eta instalazioei buruz dagoen informazioa berrikusi eta eguneratuko da. Horretarako, besteak beste, eraikuntza-urtea, katastroko informazioa eta ortofotografien eta kolore faltsuko irudien azterketa hartuko dira kontuan. Bereziki identifikatuko dira, halaber, kalteberatzat jo daitezkeen kokapen publiko eta pribatuak, hala nola osasun, hezkuntza, kultura edo kirol zentroak.
Ondoren, oinarrizko etapan landa-lana eta kanpo-ikuskapen bisualak egingo dira aurretiazko erroldan jasotako eraikin eta instalazioetan. Bisita horiei esker, amiantoa duten material posibleak identifikatu, aurretik bildutako informazioa egiaztatu eta atzemandako materialen egoera baloratu ahal izango da. Besteak beste, estalkiak, zorrotenak, jardinerak, paramentuak edo fatxadak berrikusiko dira.
Helburua da datu-base homogeneo eta georreferentziatu bat izatea, udalerrian dauden amiantodun material posibleen identifikazioa, sailkapena eta kudeaketa errazteko.
Emaitzak datu horiek kudeatzeko gaitutako informazio geografikoko tresnetan txertatuko dira.
Lanak, gainera, barne hartuko du azken txosten bat egitea, herritarrei zuzendutako hedapen dokumentu bat, lortutako emaitzetan oinarritutako erretiratze plan bat eta ekintza plan bat, beharrezkoa den kokalekuetan etorkizuneko ikuskapen zehatzak sailkatzeko eta lehenesteko.
Aurretiazko eta oinarrizko etapak osatzeko aurreikusitako epea gehienez lau hilabetekoa da, enpresak geoUdala plataforman aurrez kargatutako udalerriko datuak eskuratzen dituenetik kontatzen hasita.
Estibaliz Sasiain Ingurumen zinegotziak nabarmendu duenez, “errolda hori egiteak aukera emango digu gure udalerrian egon daitekeen amiantoaren argazki zehatzagoa izateko eta, batez ere, modu ordenatuan eta lehenetsian jokatzen lagunduko digun informazioa izateko”. Ildo horretan, “material horiek non aurki daitezkeen eta zer egoeratan dauden jakitea oinarrizko lehen urratsa da, horiek behar bezala kudeatu eta erretiratzeko, bereziki zaurgarritasun handiagoa izan dezaketen espazioetan”, adierazi du.
Errolda hori eginda, Amurrioko Udalak aurrera egiten du udalerrian egon daitekeen amiantoaren ezagutzari eta kudeaketari dagokienez, eta tresna bat sortzen du informazio sistematizatua izateko eta lortutako emaitzen arabera jarduteko lehentasunak ezartzeko.