Urtero bezala, Bizkaiko Europear Jardunaldiek bertoko ondare arkitektonikoa ezagutarazteko hainbat jarduera prestatu ditu aurtengo urrirako. Gure eskualdean ere, ekitaldi hauetako batzuk ospatu egingo dira, konkretuki Urduñan eta Orozkon.
Urduñan, hiriko arkupeetako muralak ezagutzeko aukera egongo da bisita gidatu baten bitartez.
Urduñako enparantzan kokaturik dauden arkupe hauek, XV. Mendearen bukaeran hasi ziren eraikitzen, gaur egunerarte erreforma ugari izan dituztelarik. Erreforma hauetako azkenengoan, artista garaikideen 14 mural ipini izan dira. Mural horiek, helburu ornamentala betetzeaz gain, bisitariak enparantza eta arkupe horiek duten iraganeko azoka garaietara hurbiltzea dute. Mural hauek, ardatz nagusi bezala izango ditu bisita gidatuak, arte lan hauen bitartez Urduñako historia eta bere pasarteak ezagutarazi egingo direlarik.
Hitzordua, urriaren 12,19, eta 26ean, larunbatetan, izango da, goizeko 12:30etan. Elkarreratze gunea Urduñako Turismo bulegoa izango da. Bisitan parte hartu nahi dutenen kopurua mugatua izango da, beraz, interesdunek Urduñako Turismo bulegoan, edota 945384384 telefono zenbakiarekin harremanetan ipiniz, izango dute erreserba egiteko aukera.
Kurtzegango Menhirra eta Goikiriko gangak
Aurreko astean, hedabide honetan, Untzuetako gaztelua ezagutarazteko ospatu egingo den mendi-txangoaren berri eman genuen Europear Jardunaldi hauen barruan. Txango hau ez da Orozkon egingo den ekitaldi bakarra, izan ere, beste bi ekimen aipagarri burutu egingo dira datorren hilabetean.
Alde batetik, hilaren 12an, Kurtzegan-eko Menhirra mintzagai izango duen mendi-ibilaldi/hitzaldia ospatu egingo da. Ibilaldi honek, Orozkoko Museoan izango du hasiera goizeko 9:30etan, Zubiaurretik Beraza auzoraino autoz igoz. Auzo horretatik oinez egingo da ibilbidea. Partaidetza mugatuta egongo da, eta bai Orozkoko museoan, zein 946339823 telefonora deituz, egin daitezke txangoan parte hartzeko erreserbak. Ekitaldi hau Orozkoko Udalak, Aunia Elkartearekin batera, antolatu du. Hizlaria Juan Carlos Lopez Quintana izango da.
Bestetik, hurrengoko larunbatean, urriaren 19an, Goikiriko gangak ezagutzeko bisita gidatua burutuko da.
1770ean, Goikiriko biztanleek, auzoko biztanle batek Mexikotik bidalitako 2000 pesotako dirutza jaso zuten. Diru horrekin, auzoan zegoen baseliza zaharra bota, eta berri bat eraikitzea erabaki zuten. Baseliza berri honek, loreontziz, piramidez, arranoz… bezalako objetuez apaindutako egurrezko ganga baten bitartez estali egin zen. Gaur egun, baseliza hau berriztatua izaten ari da, eta horren arira, bisita honetan, Javier de Miguelek kontserbazio lanen nondik norakoak azalduko ditu. Horrez gain, Juanjo Hidalgok tenplua eraikia izan zeneko kontaketa historikoa egingo du.