Prentsa ohar batean adierazi duen bezala, proiektu honen helburu nagusiak eskualdeko baliabide hidrikoak babestea eta hobetzea izango liratezke.
Helburu horiek lortzeko, urak garbitu eta tratatu egingo dira ibaiek jasoko dituzten isurketak kalitate onekoak izateko. Horrek azpiegitura lan batzuk egitea suposatuko du, konkretuki, ondorengo hauek:
1.-Herrietako isurketak garraiatzeko sarea baten garapena.
2.-Zazpi gordailu aurregarbiketa egiteko eta araze-tokietako ur sarrera zaintzeko.
3.-Ur kutsatuen bonbeo geltokiak (EDAR) Luxaondon eta Aretan.
4.-Teknologia berriko hiru araztegi berri: Markixanako EDAR, Amurrio eta Aiarako urak zainduko dituena. Basaurbeko EDAR, Laudio eta Orozkoko uren ardura izango duena, eta Urtabeko EDAR, Artzeniegan.
5.-Sistema orokorretan sarturik egongo ez diren eremuetan erantzun autonomoak emango dira.
Plangintza honek, 90 milioi eurokoa, oraindik ingurugiroan sortuko duen kalteen ebaluazio fasean dago, eta ondorengo erakunde hauen babesa jaso du:
-Eusko Jaurlaritza, URA-ren bitartez (Euskal uren agentzia).
-Estatuaren Administrazioa.
-Arabako Foru Aldundia.
-Kantauriko Urkidetza, Udal ezberdinak batzen dituena.
Ur Partzuergoaren oharrak adierazi duenez, honelako planen bitartez, gure ibaietan bainatzea, arrantza egitea, edota fauna eta flora berreskuratzea geroz eta hurbilago izango ditugu.
Argazki lehiaketa
Plan honi buruzko informazioa herritarrei postaz bidaliko zaie. Horrez gain, Laudion, Amurrion, Luxaondon eta Artzeniegan informazio panel ezberdinak ipiniko dira.
Herritarrak proiektu honetan zertxobait murgiltzeko asmoarekin, Ur Partzuergoak ere argazki lehiaketa bat antolatu du, txapelketaren gai nagusia gure ibaiak direlarik.
Bainatzen, jolasten edota gure ibaiek eskaintzen duten paisaietaz gozatzen agertzen den jendearen argazkiak jaso egingo dira kantaurikokidetza.net webgunean. Bertara iritsitako lehenengo ehun argazkiek etxeko ura aurrezteko gailu bat jasoko dute sari bezala.