Tantaka jarraitzen dute inplementatzen Eusko Jaurlaritzako zein Nafar Gobernuko Hezkuntza Sailek LOMCE legea. Ikasturte honetan LOMCEtik eratorritako errebalida guztiak (LH3-LH6-DBH4-Batxilergo 2) ari dira egiten. Guk hiru ikasturte daramatzagu planto jarrerarekin. Zergatik? Ebaluazioa ezin delako curriculumaren helburua bilakatu. Ikaslea soilik ebaluatzen delako, sistema guztia baloratu beharrean. Hezkuntza komunitatearen iritzia ez delako kontuan izan. Hizkuntza, matematika eta zientziak bakarrik neurtzen dituelako. Emaitzek ez dutelako emaitza akademikoetarako balioko. Arrotza, antipedagogikoa, atzerakoia eta segregatzailea delako.
Aiaraldean txalotzekoa izan da aurreko ikasturteetan eskola komunitateak izan duen plato jarrera. Aurten Zaraobeko DBH4ko ikasleak izan dira “aukeratuak” errebalida hau egiteko. Ikasleak, familiak, langileak eta gizartea prest dago planto egiteko. Zaraoben ere, Euskal Herriko beste hainbeste ikastetxeetan bezala, azterketa egunean ikasgelak hutsik agertuko dira. Eusko Jaurlaritzak Heziberriren bidez inposatu nahi digun LOMCE legeari aurre egingo diogu.
Hego Euskal Herriko gobernuek ausardiaz jokatu beharko lukete, benetan hezkuntza komunitatearen beharrei erantzungo dion ebaluazio propioari bidea emanez.