Izan zirelako gara, garelako izango dira. Laudio Ikastolako ikasle ohiek ere Araba Euskarazekin bat egin dute eta horretarako ikasle ohien sarea sortu dute. Esandakoaren arabera, dagoeneko 300 lagun baino gehiago elkartu dira sarera. “Urte desberdinetan zehar, ehundaka ikasle batu gaitu Laudio Ikastolak. Ikastolako ateak igaro eta bizitzak bide desberdinetatik banatu gaitu gutako gehienak. Alabaina, badugu elkartzen gaituen zerbait: mediku, tabernari, kazetari, arotz, irakasle... izan arren Laudio ikastolan igarotako 18 urteek gaur egun ere Ikastolaren parte sentiaraztea”, nabarmendu dute.
Ikasleek urtarrilean abiatu zuten ekainaren 19a, hau da, Araba Euskarazen eguna bitarteko hilabete guztietako 19an ekimenen bat egiteko konpromisoa. Urtarrilean kantu dantza kalejira eta otsailean herriko gaztetxean rock kontzertuak antolatu zituzten. Hilabete honetarako, aldiz, 19a larunbata dela kontuan izanda ikasle eta langile ohien bazkaria antolatu dute. Bazkarirako txartelak Indriska, Arrañope eta Laudio Ikastolako idazkaritzan daude salgai, 15 eurotan.
Era berean, bazkariaren egunean aurtengo Araba Euskaraz islatuko duen “familia argazkia” egingo dute. Bazkalostean, Izargi erromeria taldeak girotuko du ikastolako frontoia. Hala ere, kanpoan bizi edo bertaratzerik izango ez duten ikasle ohientzako ikasleohiak@laudioikastola.net posta elektoniko kontua zabaldu dute agurrak bidali nahi dituztenentzat; “toki bat eskainiko diegu bazkarian”.
Ekintza horietaz aparte, Laudio Ikastolako argazki artxibategi historikoa osatzen ari dira “ikastolako web gunean argazki album publiko bat ezarri da ikasle ohien talde argazkien bilduma eratzea bultzatzeko. Argazki albumak berak argazkiak onartzen ditu eta ikasleohiak@laudioikastola.net helbidea zabalik dago ere argazkiak jasotzeko”. Ikasle ohien sareak gogorarazi duenez, asteartero 17:30ean biltzen dira Laudio Ikastolan: “Izan zirelako bagara eta garelako izango badira zu ere behar zaitugu!”.