Heltzear dagoen igande honetan, hots, ekainaren 3an, Laudioko III. Irristaldia ospatuko da. Eskualdean geroz eta arrakasta gehiago duen kirolaren jarraitzaleek abagune polita izango dute irristailuen artean goiza pasa dezaten.
Bi ibilbide aurreikusita daude: alde batetik, umeen ibilbidetxoa egingo da, bestetik, nagusiena. Biak ala biak Aldai plazatik abiatu eta hantxe amaituko dira. Etxeko txikienei zuzenduta dagoen ibilbidea 1,8 km-koa da. Nagusien ibilbidea, ordea, luzeagoa, 10km-koa izango baita. Ibilbide laburrean zein luzean parte hartu ahal izateko, babesak eta kaskoaren erabilera ezinbestekoa izango da.
Irristalarien parte hartzea kontrolatua egon dadin izen-ematea aldez aurretik edo irteeran bertan egingo da. Aldez aurretik eginez gero, 2 euro ordaindu beharko da, Euskadiko Kutxan 3035-0045-27-0451137836 kontu korrontean sartuz. Irteera puntuan eginez gero, prezioa pixkat garestiagoa izango da, 5 eurotakoa. Beraz, eta antolatzaileen hitzak jarraituz, oso garrantzitsua da aldez aurretiko izen emate indibidualak egitea eta izen abizenak argi agertzea.
Goizeko ahaleginak sari bat izango du eguerdi partean, ibilbideak amaitzen direnean zenbait ekintza programatuta baitaude. Roller dance (nahi duenak parte hartzeko moduko dantza klasea) edota Patin-poteoa, besteak beste. Hau bakarrik ez, ekintza hauek bukatuta, bazkari bat egongo delako, Zizki-Mizkiko jatetxean ospatuko dena. Bazkari honetan parte hartzeko ezinbestekoa izango da arestian aipatutako kontu korronte zenbaki berean 13 euroko kantitatea ingresatzea.