Aurki Laudioko AEKk, Udal Euskara zerbitzuarekin batera, Berbalagun programaren barruan kokatzen den ekintza berria abian jarriko du; Gurasolagun. Egitasmo honen xede nagusia inguruko guraso eta seme-alabentzako erakargarria den espazio berri bat eskaintzea litzateke. Hots, espazio berri eta erakargarri bat non euskara praktikatzeko eta gozatzeko aukera izango duten, gainera partehartzea doakoa izango da.
Esan bezala, Gurasolagun guraso eta seme-alabei zuzenduta dagoen egitasmoa dugu eta euren arteko harremana euskalduntzeaz ez ezik, beste familia euskaldunekin harremanetan jartzeko bidea zabalduko du.
Momenturarte deialdiak harrera ona izan du, 25 bat guraso eta 30 bat ume izena eman dutelarik. Hala ere, proiektuaren alor batzuk zehazteke daude eta azken ukituak emate aldera eta lehengo kontaktua ahalbideratzeko asmoz batzar bat deituta dago ostiral honetarako, urtarrilak 27. Batzarra Laudioko Basalarrina elkartearen egoitzan (Azoka plaza) ospatuko da arratsaldeko 17.30etan eta ordu beteko iraupena izatea aurreikusita dago.
Batzarrera gerturatzen den orok zalantzak zein aportazioak egiteko, egitasmoaren nondik norakoak ezagutzeko, zein proiektuaren norabidean parte hartzeko beta izango du. Umeek ere hitzordua izango dute ostiralean, izan ere, Kirikiño taldeko begiraleren bat egongo da haiekin jolas moduko tailertxo bat garatzen.
Lehenengo aldia da gure eskualdean horrelako ekintza bat aurrera eramaten dena. Hala ere, Gurasolagun egitasmoa Euskal Herriko hainbat herritan martxan da dagoeneko, mehatzaldeko zenbait herritan edota Arrasaten, besteak beste.
Informazio gehiago nahi duenak aiaraldea.blogspot.com helbideran izango du eskura.