Egunotan, urtarrilaren 13 eta 14an, Amurrioko RASD elkarteak mota askotariko elikagaiak batuko ditu basamortuan aurkitzen den Tinduf-eko (Aljeria) errefuxiatu kanpamenduetara bidaltzeko xedearekin. Aurrekoetan bezala, elikagaien bilketa “Alimenta una esperanza” kanpainaren barruan kokatzen da. Izan ere, elkarteak zortzi urte daramatza lanean horrelako ekimenek aurrera egin ditzatela.
Basamortuan aurkitzen diren errefuxiatuen kanpamenduetan bizi direnak, belaunaldiz belaunaldi eskubideen urraketa lazgarriak pairatzen ari dira, salbuespen egoera honen eraginagatik etengabe sufrituz.
Elikagaien bilketa arestian aipatutako egunetan izango da eta Amurrioko hainbat supermerkatutan burutuko da. Bertan elkartearen bolondresak aurkituko dira, baita ekimen honetan interesa duen edozein ere, hiritartasunaren parte hartzea bultzatzeko eta kanpainari buruzko azalpenak emateko prest.
Nahiz eta garai hauetan bizi den krisiaz kontziente izan, RASD elkarteak hiritarrak parte hartzera animatzen ditu, eta amurrioarren, zein ingurukoen, ekarpen guztiak esker onez hartuko direla luzatu dute.
Elkartetik aditzera eman denez, elikagai premiazkoenak eta egokienak hurrengoak lirateke: lekariak, arroza, azukrea, hegalaburra eta emakumeentzako konpresak, besteak beste.
Kanpaina amaitzen denean, elikagai guztiak batu, paketatu eta Euskaditik Tinduf-erako ibilbidea egingo duen karabanan bilduko dira. Karabana honi, autonomi erkidego ezberdinetatik abiatzen diren beste batzuk batuko zaizkio urtean zehar.
Kanpainari buruz informazio gehiago nahi duenak elkartearen posta elektronikora joz eskura dezake; RASD (Amurrio) arasd.amurrio@hotmail.com.