36 lagun elkartu ginen afaltzera, elkarteari itxura ederra emanez. Iker Elexpuruk eta laguntzaileek prestatutako afari mundialean (horrelako sukaldariarekin kezka gutxi izaten da kantitate eta kalitatean) jandako guakamole, indioilar, falafel eta abarrekin digestioa egiteko denborarik gabe hasi zen bertsoaren festa.
Bertso idatzien txanda izan zen aurrena eta horretarako Aramaioko Kantu Lagunak taldeak ahots ederrez kantatu eta dantzatu zituzten herriko himnoak bihurtzeko aukera asko dituzten hainbat bertso ("Gora herri txiki ta bizixe!").
Bat bateko saiorako aurrez aurre Aiaraldetik etorritako Alfreedo taldea (Izar Mendiguren, Unai Mendibil eta Asier Rubiok osatuta) eta Aramaioko Ibabeko Bertan bilobak taldea (Xabi Igoa, Andere Arriolabengoa eta Manex Agirrek osatuta) izan genituen. Sarrerako agurretarako aramaioarrek Al Bano eta Romina bertsioneatuz eta Aiaraldekoek gitarra lagun hartuta ederki berotu zuten giroa. Lierni Altuna gaijartzailearen esanak jarraituz bertsolariek bete zituzten egin beharreko lanak eta azkar pasa zen saioa entzulearentzat, bertsoaldi onak joan ziren seinale.
Bukaeran epaileek puntu batuketak egin eta gero Aramaioko Ibabeko Bertan bilobak taldea atera zen garaile.
Hauxe da Aramaioko Kantu Lagunak taldea egindako bertso sorta:
Santa eskeko kopla doinue: “Aramaixo, auzoik auzo”
Auzo edo herritarrik
ez dago esan biherrik
Aramaixoko ekosistema
ez da Ibarra bakarrik
ESTRIBILLUE
Bailara gisa haundixe
herri txiki ta bizixe
etxerik etxe, auzorik auzo
eitten da gure herrixe
Aukerako pasiara
Anbotopeko maldara
Aukera ona da ezautzeko
Etxaguen eta Gantzaga
ESTRIBILLUE
Argazki on baten bila
benetako marabila
Muru azpiko parajietan
topauko dozu Untzilla
ESTRIBILLUE
Gureixan begira jarri,
desafioka elkarri
Aldapa batek bereizten dittu
Aixola ta Uribarri
ESTRIBILLUE
Aramaion egon ziren Aiaraldeko bertsolariak kuadrillen arteko txapelketan
2018ko urt. 30a, 14:44
Ederra joan zen Aramaioko Marixeka elkartean urtarrilaren 26 gaueko saioa. Kanturako prest etorri ziren Ibabeko Bertaren bilobak anfitrioiak eta Alfreedo taldeko Aiaraldeko kideak.
LAGUN AGURGARRIA:
Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide