Arabako Foru Aldundiak iragarri du ogasuneko erdi mailako teknikarien lan poltsa bat eratuko duela, errenta kanpainak eta kudeaketa eta zerga likidazio atalek sortutako aldi baterako langile beharrak betetzeko. Lan poltsa horren bitartez, foru erakundeak 40 eta 45 pertsona bitartean kontratuko ditu, iraupen desberdineko lanpostuetarako.
Enplegu, Merkataritza eta Turismo Sustapenaren eta Foru Administrazioaren Sailak deialdi publiko hori iragarri du 2009an 215 pertsonarekin eratutako ogasun teknikarien lan poltsa ia agortuta dagoelako eta egungo langile beharrei erantzuteko nahikoa ez delako.
Lan poltsa horretan sartzeko aukera izateko, ezinbestekoa da ingeniari teknikoaren edo arkitekto teknikoren titulua edo gradua edo unibertsitate diploma izatea edo haiek eskuratzeko legez ordaindu beharrekoak ordainduta izatea. Unibertsitate diplomaren baliokide da lizentziatura bateko lehen hiru ikasturteak osorik gaindituta izatea.
Hautaketa prozesuak bi fase izango ditu. Lehena ezaupide proba bat izango da, test erakoa, nahitaezkoa eta baztertzailea. Hartan izangaiek gai zerrendari buruzko galdetegi bati (aukera anitzeko (4) galderak) erantzun beharko diote; bigarrena, merezimendu balioespena.
Zehatz-mehatz, foru aldundietako azken bost errenta kanpainetan lan egin izana eta 2., 3. edo goragoko hizkuntza eskakizuna izatea balioetsiko da.
Deialdian parte hartu nahi dutenek 2015eko azaroaren 13ra arte, hots, datorren ostiralera arte, barne, dute eskaerak aurkezteko beta. Eskaera horiek Arabako Foru Aldundiaren Erregistro Orokorrean, oinarrietako eranskinean ageri den ereduan, edo www.alava.net/PortalEmpleo web orrian aurkeztu ahal izango dira.
Internet helbide horretan, halaber, eskueran dituzu deialdiaren oinarriak eta gai zerrenda. Era berean, bitarteko horren bidez jakinaraziko zaizkie izangaiei prozesuaren faseak.
Hauek jakinaraziko dituzte lan poltsa horren deialdian parte hartzeko eskaera egiten duten pertsonek: eskatutako betekizunak betetzen dituztela, zer hizkuntza ofizialetan egin nahi duten ezaupide proba eta zer hizkuntza eskakizuna egiaztatuta duten. Une honetan ez da eskatzen inongo agiririk aurkeztea.