Arabako Foru Aldundiak eutsi egingo die aurten AP68 eta AP1 bidesaridun autobideak erabili ohi dituzten Arabako herritarrentzako hobariei, beraien bidesarien kostua arintzeko helburuarekin. Mila pertsonak baino gehiagok hartu zuten onura laguntza horietatik 2016an, 234 euroko batez besteko zenbatekoaz.
Aurrekontua, guztira, 256.000 euro izan zen.
Gaur, Foru Gobernu Kontseiluak onartu du diruz lagundu daitekeen AP68ren bide zatiko bidesariaren diru-laguntzetarako deialdi publikoa, 2017rako, bai eta horiek ordaintzeko 200.000 euroko esleipena ere. Partida hori handitu ahal izango da aurrekontuko baliabide erabilgarrien arabera, baldintzak betetzen dituzten eskaera guztiei erantzuteko nahikoa ez baldin bada.
AP1eko bidesariaren diru-laguntzetarako deialdia otsailaren 6an onartu zen foru agindu bidez, 50.000 euroko esleipenarekin batera.
Horrela, Bide Azpiegituren eta Mugikortasunaren Sailak jarraipena ematen dio laguntza programa horri, uste baitu finkatutako politika soziala dela, Arabako herritar guztientzat irekia eta, gainera, batez ere egunero beren ikastegietara edo lanpostuetara joaten diren ikasle eta langileei onura ematen diena.
Bidesari sozialaren programa 2002. urtearen hasieran sortu zen eta haren helburua, hasiera batean, lanarengatik, ikasketengatik edo beste edozein arrazoirengatik AP68 autobidean sarri ibili behar zuten arabarrei hobariak ematea izan zen. Programa hori, geroago, Gasteiz eta Eibar lotzen dituen AP1en ohiko erabiltzaileentzat zabaldu zen.
Hobari horiek bidesariaren prezio publikoaren % 50ekoak (BEZa aparte) dira, eta jasotzeko betekizunak aurreko urteetako berberak dira: ohiko bizilekua Araban edukitzea, Foru Aldundiaren Ogasunarekiko zerga betebeharrak beteta izatea eta hilabetean 25 bidaia edo gehiago egitea ibilgailu arinekin diruz lagundu daitezkeen bide zatietan.
Era berean, laguntza horiek eskuratu ahal izateko, ezinbestekoa da teleordainketako gailu bat erabiltzea, autobideetarako balioduna.
Guztira, 1.095 arabarrek hartu zuten onura 2016an gure lurralde historikoa zeharkatzen duten bi autobideetako (AP68 eta AP1) bidesariaren hobarietatik, errepide horien ohiko erabiltzaile moduan; urtean 234 euro, batez beste. Foru Aldundiak 256.000 euro eman zituen laguntza horiek finantzatzeko.
AP68 autobidearen erabilerak sorrarazi zituen iaz emandako hobari gehienak: denetara 694 pertsonak jaso zituzten laguntza horiek, bide horren ohiko erabiltzaile moduan, eta hobarien zenbatekoa 214.82 euro izan zen. AP1 autobidearen kasuan 401 izan ziren onuradunak, eta 41.630 euro jaso zituzten hobaritan.