Azaroaren 25ean izango da Emakumeenganako Indarkeriaren Aurkako Nazioarteko Eguna. Arabako Foru Aldundiak, Gasteizko Udalarekin batera, sentsibilizazio eta kontzientziazio kanpaina bat jarriko du abian lurralde osoan. Baita askotariko programazioa ere, herritar guztientzako, oro har, eta bereziki gazteentzako. Hitz joko bat erabiliz, "Aske bizi (raun) nahi dugu - Queremos (sobre) vivir libres", gizarte osoari eskatu nahi diote erantzukizunez jokatzeko, emakumeek indarkeria matxistarik gabe bizitzea bermatzeko.
Aldundiak txartelen bidez zabalduko du erakunde kanpaina, lurraldeko leku guztietara iristen dela bermatzeko, bereziki landa eremura eta Arabako kuadrilletara. Araba Buseko autobusetan ere jarriko dituzte txartelak.
Horrez gain, Gizarte Ongizaterako Foru Erakundeak zenbait informazio saio antolatu ditu emakumeek indarkeria egoeretan dituzten eskubideei buruz, eta baita erabil ditzaketen baliabide juridikoez ere. Horietan, Susana Cambrana arituko da, abokatua eta Hegoak foru zerbitzuko arreta soziojuridiko espezializatuko arduraduna. Azaroaren 15ean eta 22an eta abenduaren 13an izango dira, Laudion, Amurrion eta Araian.
"Libre bizi nahi dugu. Emakumeok argi dugu. Eta zuk?" lema loturik dago Emakundek antolatutako Beldur Barik erakundearteko programarekin. Eskualdean lehiaketa propioa antolatu dute. Gazteentzako dinamika horren helburua da talde eztabaida eta hausnarketa sustatzea, hainbat baliabide erabiliz. Urduñan izango da Aiaraldeko txapelketaren sari banaketa, hilaren 23an.
Laia Eskola da Arabako Foru Aldundiak berdintasuna sustatzeko abian jarri duen egitasmoa
Laia Eskola abian
Hainbat ekimen sustatu ditu Arabako Foru Aldundiak Aiaraldean azken urteetan indarkeria matxistaren aurka borrokatu eta berdintasuna sustatzeko. Laia Eskola da horietako bat. Egitarau oparoa egongo da eskualdean datozen asteetan egitasmo horren barruan: hitzaldiak, berdintasun topaketak, autodefentsa tailerra, mendi orientazio ikastaroa... Aiaraldea.eus atariko agendan topatu daitezke deialdi guztien inguruko informazioa.
Besteak beste, nabarmendu beharra dago emakumeen genitalen mutilazioan aditua den Adriana Kaplanek solasaldia eskainiko duela azaroaren 29an Laudion. Arratsaldeko seiretan izango da zita, Kultura Etxean.
Astebete lehenago, aldiz, Aiaraldeko Berdintasun Topaketa egingo da Aiarako udaletxean., azaroaren 17an. Goiz osoko egitaraua prestatu dute egun horretarako, 10:00etatik 14:00etara luzatuko dena.
