Osasun krisiak errenta kanpainari ere eragin dio; izan ere, aurrez aurreko arreta irailera atzeratu da. Hala ere, Arabako Foru Ogasunak tresna informatiko berriak prestatu ditu arabarrek aukera izan dezaten aitorpena egiteko uda ostera itxaron beharrik gabe. Besteak beste, nabarmentzekoa da B@K elektronikoki identifikatzeko bitartekoa; erraz eskura daiteke araba.eus webgunean, eta aukera emango die zergadunei aitorpena egiteko beren ordenagailu, tableta edo mugikorretik, etxetik mugitu beharrik gabe. “Uste dut kanpaina honetan modua izango dela hedatzeko Rentared modalitatea, alegia, lineako errenta aitorpena. Erraza, azkarra eta segurua da”; hitz horiekin animatu ditu arabarrak Itziar Gonzalo Ogasun, Finantza eta Aurrekontu Saileko foru diputatuak, kanpainaren aurkezpenean. 2019ko errenta kanpainako beste berritasun garrantzitsu bat da aukera izango dela Rentafácil ordenagailutik ikusi eta onartzeko, eskutitza noiz iritsiko zain egon beharrik gabe. “Gaur egungo egoeraren ondorioz eskutitzak, beharbada, atzerapenarekin irits daitezkeela aurreikusita, B@K tresnaren bidez jarduteko aukera prestatu dugu; horri esker, zergadunek aukera izango dute beren Rentafácil aitorpena onartzeko kanpainaren hasieratik bertatik”, jakinarazi du Gonzalok.
Rentafacil: eskutitz kopuruaren markak hautsi dira
Halaber, diputatuak nabarmendu du aurten aurrez egindako aitorpenen bidalketa kopuruak markak hautsi dituela. Guztira 122.282 aitorpen zirriborro (Rentafacil) bidali ditu Ogasunak aurten Arabako etxeetara, iaz baino 7.264 gehiago; “Ogasuna etengabe saiatzen da zergadunei gauzak gero eta gehiago errazten”.
Aitorpena kudeatze eta aholkularitza bulegoetan edo finantza erakunde laguntzaileetan egiteko Rentaraba modalitateari dagokionez, epea irekita dago eta urriaren 30ean bukatuko da.
Ogasunari egin beharreko ordainketak azarora atzeratuko dira
Jakitun izanik zergadun askoren diru sarreretan eragina izan duela gaur egungo krisiak, Foru Ogasunak erabaki du itzulketak egiteko gehieneko 48 orduko epea mantentzea. Baina aitorpen positiboen zordunketak azaroaren 20ra atzeratuko ditu. “Arabako familiei oxigeno puxika bat eskaini nahi diegu hilabete hauetan”, azaldu du Gonzalok.
Arabako Foru Ogasunak guztira 132,4 milioi euro itzuliko dizkie 126.618 arabarri (1.046 euro, batez beste); eta 94 milioi euro jasoko ditu 43.615 zergadunengandik (2.155 euro, batez beste). Hau da, saldo garbia -38,5 milioi euro da. Iaz baino 9 milioi euro gutxiago biltzea aurreikusi da, batez ere murrizketetan eta kenkarietan izandako % 1,5eko eguneratzearen ondorioz (deflaktazioa). “Itzulketa gehiago eta sarrera gutxiago izango da”, laburbildu du foru arduradunak.