Aiaraldeko eta Arratia-Nerbioiko eskualdeei zuzeneko autobus zerbitzu berri bat Urduña, Amurrio, Aiara eta Laudio eta Galdakaoko Ospitalearen artean emateko bi erakundeek dituzten konpromisoak eta haren ezaugarriak arautzen ditu hitzarmenak. Zerbitzu berriak hiru bidaia eskainiko ditu egunero, norabide bakoitzeko, astelehenetik ostiralera: Urduñatik 07:00etan, 10:00etan eta 13:00etan aterako da, eta Galdakaoko Ospitaletik 08:15ean, 11:15ean eta 14:15ean itzuliko da.
Ordutegi horiek osasun zentroko mediku kontsultetako eta proba diagnostikoetako txandetara pixkanaka egokitzeko pentsatuta daude. Zuzeneko bidaia berriak Bizkaibusen A-3641 linean sartuko dira, eta emakidaren egungo eskaintzari gehituko zaizkio. Eskaintza horrek eguneko zazpi bidaia egingo ditu, norabide bakoitzeko, Urduñatik, Amurriotik eta Aiaratik, eta eguneko bederatzi bidaia, norabide bakoitzeko, Laudiotik.
Zuzeneko zerbitzu berria 2026ko hasieran jarriko da abian eta nabarmen hobetuko du Aiaraldearen eta Galdakaoko Ospitalearen arteko ibilbidea, gaur egun dagoen zerbitzu arruntarekin alderatuz, eta joanetorri azkarragoa eta erosoagoa eskainiko die bidaiari guztiei, eta, bereziki, zentro horretan ohiko hitzorduak dituzten eskualdeko adinekoei eta paziente kronikoei", esan du Jon Nogalesek.
Hitzarmenak dakarrena da Bizkaiko Foru Aldundiak, bere eskumenak baliatuz, bere gain hartzea Bizkaibusen bidez zerbitzu berria emateko eta kudeatzeko konpromisoa, eta Arabako Foru Aldundiak, berriz, haren finantzaketan parte hartzeko konpromisoa. Hala, Arabak inbertsioaren eta gastu operatiboen % 88 finantzatuko du, biztanleria irizpideari jarraikiz: ibilbide berriak gehienbat arabarrei emango die zerbitzua, eta neurri txikiagoan bizkaitarrei.
Zerbitzuaren kostu zenbatetsia 262.000 eurokoa izango da 2026an, eta pixkanaka handitzen joango da hurrengo ekitaldietan.