Onespen hori Artziniegako Museo Etnografikoa kudeatzeko eta finantzatzeko Arabako Foru Aldundiko Kultura eta Kirol Sailaren, Artziniegako Udalaren eta Artea Elkarte Etnografikoaren artean sinatutako lankidetza hitzarmenaren luzapenean sartzen da. Hitzarmen hori otsailaren 8ko 63/2022 Erabakiaren bidez onetsi zen. Hitzarmen horrek barne hartzen du Artziniegako Udalari dirulaguntza zuzen bat ematea, museoaren kudeaketa gastuak ordaintzeko.
Hitzarmenaren seigarren klausulak ezartzen duenez, dirulaguntza hori urte anitzekoa da, eta indarrean dagoen urteetan eutsi beharko zaio. Hala, 2023tik 2025era bitarteko urteei dagokien gastua Foru Gobernu Kontseiluaren urriaren 25eko 652/2022 Erabakiaren bidez onetsi zen.
Hasierako hitzarmena lau urterako sinatu zen, 2022ko urtarrilaren 1etik 2025eko abenduaren 31ra, eta beste lau urtez luzatzeko aukera jasotzen du. Kontuan hartuta helburuak bat datozela eta lankidetza horrek Arabako Foru Aldundiaren museo politikarako duen interesa, alderdiek adierazi dute hitzarmena 2029ra arte luzatzeko asmoa dutela.
Luzapena indarrean dagoen hitzarmena amaitu baino lehen formalizatuko da, 2026ko urtarrilaren 1etik aurrera izango ditu ondorioak, eta 5.000 euroko igoera izango du urteko ekarpenean.
Arabako Foru Aldundiaren 2026rako aurrekontu proiektuak "Artziniegako Udala: Etnografia Museoa" partida jasotzen du, urtean 60.000 euroko konpromiso kredituarekin 2026., 2027., 2028. eta 2029. urteetan, hau da, 240.000 euroko ekarpena, guztira.